ឆេះឃ្លាំងលក់សម្ភារៈសំណង់មួយកន្លែងទាំងព្រឹកនៅខេត្តកំពង់ស្ពឺ

ឃ្លាំងលក់សម្ភារៈសំណង់មួយកន្លែង ត្រូវបានអគ្គិភ័យឆាបឆេះទាំងព្រលឹមស្រាងៗ បណ្តាលឲ្យខូចខាតស្ទើរទាំងស្រុងដោយសារឆ្លងចរន្តអគ្គិសនី ។

ករណីគ្រោះអគ្គិភ័យឆេះឃ្លាំងលក់គ្រឿងសំណង់ខាងលើ កើតឡើងនៅវេលាម៉ោង៤និង២០នាទី នៅព្រលឹមថ្ងៃទី១៩ ខែវិច្ឆិការ ឆ្នាំ២០២២នេះ ត្រង់ចំណុចភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។

លោកវរសេនីយ៍ត្រី វិន ឡេងហួង មេបញ្ជាការកងរាជអាវុធហត្ថស្រុកសំរោងទង បានឲ្យដឹងថា អគ្គិភ័យបានឆាបឆេះឃ្លាំងលក់គ្រឿងសំណង់មួយកន្លែងរបស់ឈ្មោះ សន វីគ្រែន ភេទប្រុស អាយុ៣៤ឆ្នាំ និងប្រពន្ធឈ្មោះ សន លក្ខិណា អាយុ៣១ឆ្នាំ រស់នៅភូមិ-ឃុំកើតហេតុ ដែលមានទំហំ១៥ម៉ែត្រគុណ៣០ម៉ែត្រ ជញ្ជាំងថ្ម ដំបូលប្រក់ស័ង្កសី ខូចខាតសម្ភារៈសំណង់មួយចំនួនធំ ប៉ុន្តែសំណាងល្អមិនបណ្ដាលឲ្យរងគ្រោះដល់មនុស្សឡើយ ។

ក្រោយពេលកើតមានអគ្គិភ័យឆេះឃ្លាំងលក់គ្រឿងសំណង់នោះ រថយន្តពន្លត់អគ្គិភ័យរបស់អធិការនគរបាលស្រុកសំរោងទង និងស្នងការនគរបាលខេត្តបានចេញប្រតិបត្តិការជួយបាញ់ទឹកពន្លត់ផងដែរ ។

ចំពោះមូលហេតុសមត្ថកិច្ចសន្និដ្ឋានជំហានដំបូងអាចបណ្តាលមកពីចរន្តអគ្គិសនី ។ នេះបើយោងតាមកាបញ្ជាក់ពីម្ចាស់ឃ្លាំងរងគ្រោះផ្ទាល់៕

អត្ថបទ៖ ភួង រដ្ឋា