ឆេះក្បាលរថភ្លើងទាំងកណ្ដាលថ្ងៃពេលកំពុងធ្វើដំណើរតាមផ្លូវនៅបាត់ដំបង

ក្បាលរថភ្លើងមួយត្រូវបានអគ្គីភ័យឆាបឆេះទាំងកណ្តាលថ្ងៃ ខណៈកំពុងធ្វើដំណើរដោយសារតែក្បាលរថភ្លើងតូច ហើយប្រឹងអូសទូរសណ្តោងដែលដឹកលើសកម្លាំងបណ្តាលឲ្យកកិតបែកផ្កាភ្លើងឆាបឆេះតែម្តង។

ហេតុការណ៍នេះបានកើតឡើងនាថ្ងៃទី ២៥ ខែ ធ្នូឆ្នាំ២០២២ វេលាម៉ោង ១១ និង៣០នាទី ថ្ងៃត្រង់ នៅចំណុចក្រុមទី២ ភូមិកៀនកែស១ ឃុំគោកឃ្មុំ ស្រុកថ្មគោល ខេត្តបាត់ដំបង ដោយក្បាលរថភ្លើង ដែលត្រូវភ្លើងឆេះនោះ ជារបស់ក្រុមហ៊ុនROYAL RAIL WAY អ្នកបើកបរមានឈ្មោះ ឆន ផាន់នី ភេទប្រុស អាយុ៣១ឆ្នាំ មានទីលំភូមិបឹងគ្រំលើ ឃុំបឹងគ្រំ ស្រុកល្វាឯម ខេត្តកណ្តាល។

ភ្លាមៗនោះដែរ កម្លាំងសមត្ថកិច្ចស្រុកថ្មគោលបានចេញរថយន្តពន្លត់អគ្គីភ័យ ដើម្បីជួយអន្តរាគមន៍ ទើបធ្វើអោយអណ្តាតភ្លើងស្ងប់ស្ងាត់ទៅវិញបាន ប៉ុន្តែក្បាលរថភ្លើងត្រូវខូចខាតប្រមាណ៥០%។

ក្រោយការត្រួតពិនិត្យពីសមត្ថកិច្ចទើបដឹងថា មូលហេតុ គឺក្បាលរថភ្លើងតូច សណ្តោងទូរចំនួន ១២ទូរ ដែលក្នុងទូរនីមួយៗមានផ្ទុកស្រូវពេញ ដែលសរុបទាំងអស់មានទម្ងន់ ៧២០ តោន លើសកម្លាំងម៉ាស៊ីន បណ្តាលឱ្យម៉ាស៊ីនប្រឹងអូសកកិតចេញភ្លើងឆាបឆេះតែម្តង តែមិនបណ្តាលអោយគ្រោះថ្នាក់ដល់មនុស្ស និងប៉ះពាល់ដល់ស្រូវឡើយ៕

អត្ថបទ៖ សោ និយមរ័ត្ន