សន្តិសុខសង្គម

មន្ត្រីអន្តោប្រវេសន៍ នាំខ្លួនជនជាតិចិន ០៤ នាក់ មកធ្វើការសាកសួរ ករណីសង្ស័យស្នាក់នៅខុសច្បាប់

បានផុស

៤ years មុន

នៅ

ថ្ងៃសៅរ៍ ១៤ មករា ២០២៣

ដោយ

កម្លាំងជំនាញផែនការងារអន្តោប្រវេសន៍ សហការជាមួយកម្លាំងអធិការដ្ឋានក្រុងបាត់ដំបង កាលពីថ្ងៃទី ១៣ ខែមករា ឆ្នាំ ២០២៣ បាននាំខ្លួនជនជាតិចិនចំនួន ០៤ នាក់ មកធ្វើការសាកសួរនៅការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលខេត្តបាត់ដំបង ករណីសង្ស័យស្នាក់នៅខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ បានឲ្យដឹងថា មុននឹងឈានដល់ការនាំខ្លួនជនជាតិចិនទាំងនោះមកសាកសួរ បន្ទាប់ពីមានករណីជនជាតិចិនម្នាក់ បានលោតពីលើផ្ទះជាន់ទី ០១ កាលពីវេលាម៉ោង ២ យប់ ចូលព្រឹកថ្ងៃសុក្រ ទី ១៣ ខែមករា ឆ្នាំ ២០២៣ ស្ថិតនៅបុរីរំចេក ក្រុមទី ១១ ផ្ទះលេខ ១៩០ ភូមិរំចេក ០៤ សង្កាត់រតន ក្រុង/ខេត្តបាត់ដំបង ដោយមានរថយន្តមួយគ្រឿង ម៉ាក Hight Lander ពណ៌ទឹកប្រាក់ ស្លាកលេខ ភ្នំពេញ 2AH- 9712 ចាំទទួលដឹកយកចេញទៅបាត់ បង្កឲ្យមានការភ្ញាក់ផ្អើលដល់ពលរដ្ឋរស់នៅក្បែរនោះ រាយការណ៍មកសមត្ថកិច្ច។

របាយការណ៍ បានបន្តថា ជនជាតិចិនទាំងនេះ ទើបចូលមកស្នាក់នៅ ដែលជួលផ្ទះពីឈ្មោះ ហាក់ សុផាណា ភេទស្រី ជនជាតិខ្មែរ អាយុ ៣៩ ឆ្នាំ មានទីលំនៅភូមិ ២០ ឧសភា សង្កាត់ស្វាយប៉ោ ក្រុង/ខេត្តបាត់ដំបង មុខរបរគ្រឿងចម្លាក់ (មានកិច្ចសន្យាជួល)។

ជនជាតិចិនទាំង ០៤ នាក់ ទី១-ឈ្មោះ HUANG ZHONGZHENG ភេទប្រុស អាយុ ៣៧ ឆ្នាំ កាន់លិខិតឆ្លងដែន EF8117800 ទិដ្ឋាការផុតសុពលភាព ១២ មករា ២០២០។ ទី២-ឈ្មោះ WANG SHUAI ភេទប្រុស អាយុ ៣១ ឆ្នាំ កាន់លិខិតឆ្លងដែនលេខ EF25282533 ទិដ្ឋាការផុតសុពលភាព ១១ មករា ២០២៣។ ទី៣-ឈ្មោះ ZHANG HAI LONG ភេទប្រុស អាយុ ៣៥ ឆ្នាំ លិខិតឆ្លងដែនគ្មាន។ ទី៤-ឈ្មោះ CHEN QIANG ភេទប្រុស អាយុ ៤០ ឆ្នាំ លិខិតឆ្លងដែនគ្មាន។

តាមការបំភ្លឺរបស់ជនជាតិចិនទាំង ០៤ នាក់ បានឲ្យដឹងថា ជនជាតិចិន ០១ នាក់ ដែលបានរត់គេចខ្លួននោះពួកគេមិនស្គាល់អត្តសញ្ញាណទេ ដោយម្នាក់នោះបានមកពីខេត្តព្រះសីហនុជាមួយគ្នា មកកាន់ខេត្តបាត់ដំបង កាលពីថ្ងៃទី ១០ ខែមករា ឆ្នាំ ២០២៣ ក្នុងគោលបំណងមកបើកហាងបញ្ចាំសម្រាប់ជនជាតិចិន។

ដោយបានការឯកភាពពីថ្នាក់ដឹកនាំអគ្គនាយកដ្ឋានអន្តោប្រវេសន៍ ការិយាល័យជំនាញ បានរៀបចំបញ្ជូនជនជាតិចិនទាំង ០៤ នាក់នេះ ទៅកាន់អគ្គនាយកដ្ឋានអន្តោប្រវេសន៍ ដោយពុំមានឯកសារធ្វើដំណើរគ្រប់គ្រាន់ និងផុតសុពលភាព និងរថយន្តមួយគ្រឿង ដើម្បីចាត់នីតិវិធីតាមច្បាប់៕

អត្ថបទ ៖ សំអឿន