ក្រុមជនសង្ស័យមួយក្រុមមានគ្នា០៤នាក់ ដែលតែងតែប្រើកាំបិត ដាវ និងដុំថ្មគប់កញ្ចក់រថយន្តរួចគំរាមតៃកុងរថយន្តដើម្បីប្លន់បូមប្រេងម៉ាស៊ូតពីរថយន្តដែលឈប់សម្រាកពេលយប់ៗត្រូវបាននគរបាលបង្រ្កាប ។

ប្រតិបត្តិការបង្ក្រាបក្រុមជនសង្ស័យគំរាមប្លន់បូមប្រេងពីរថយន្តពេលយប់នេះ ធ្វើឡើងនៅថ្ងៃទី៣១ ខែមករា ឆ្នាំ២០២៣នេះ ក្រោយពីមានការបង្ហោះ និងចែកចាយព័ត៌មានពីបណ្ដាញសង្គមថា មានករណីក្មេងទំនេីងធ្វើសកម្មភាព ប្លន់ប្រេងពីរថយន្ដដែលឈប់សម្រាកពេលយប់នៅតាមបណ្ដោយផ្លូវជាតិលេខ៤ ក្នុងស្រុកភ្នំស្រួច ។

បន្ទាប់ពីជនរងគ្រោះបង្ហោះលើបណ្តាញសង្គមលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានដាក់បញ្ជាឱ្យផ្នែកយុត្តិធម៌ស្រុកភ្នំស្រួច បេីកការស្រាវជ្រាវរកមុខសញ្ញាក្រុមជនសង្ស័យទាំងនោះដេីម្បីចំណាត់ការ និងបង្រ្កាប។

ជាក់ស្ដែងប្រតិបត្តិការដឹកនាំពីលោកអធិការស្រុកភ្នំស្រួច ផ្នែកយុត្ដិធម៌សហការជាមួយមូលដ្ឋានប៉ុស្ដិ៍ ប្រមូលព័ត៌មាននិងឈានទៅកំណត់បានមុខសញ្ញាក្មេងទំនេីងដែលជាក្រុមធ្លាប់ប្រព្រឹត្ដបទល្មេីសក្នុងមូលដ្ឋានកន្លងមក ។

ជាលទ្ធផលសមត្ថកិច្ចជំនាញបានធ្វើការឃាត់ខ្លួនមុខសញ្ញាចំនួន៤នាក់ រួមមាន៖ ទី១- ឈ្មោះ ភា រាជ ប្រុស អាយុ២៩ឆ្នាំ ,ទី២- ឈ្មោះ មៀម សុធារៈ ប្រុស អាយុ២៧ឆ្នាំ ,ទី៣- ឈ្មោះ បេង សំណាង ហៅវិត ប្រុស អាយុ៣១ឆ្នាំ និងទី៤- ឈ្មោះ ជីង រ៉ា ស្រី អាយុ២១ឆ្នាំ ស្នាក់នៅបន្ទប់ជួលស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច ។ រីឯឈ្មោះ តូរ៉ា ប្រុស និងបក្ខពួក មួយចំនួនគេចខ្លួន ។

ក្រុមមុខសញ្ញាដែលប្លន់ប្រេងពីរថយន្តឈប់ដេកយប់ៗតាមដងផ្លូវបានឆ្លើយសារភាពថា ពួកខ្លួនពិតជាបានធ្វេីសកម្មភាពគំរាមយកដុំថ្មគប់កញ្ចក់រថយន្តយកដាវដេញគំរាមកាប់លេីអ្នកបេីកបររួចបូមយកប្រេងចេញពីរថយន្ដប្រាកដមែន កន្លងទៅ ។ ក្រុមខ្លួនតែងតែប្រព្រឹត្ដសកម្មភាពលួចបូមប្រេងពីរថយន្តញឹកញាប់ និងគប់កញ្ចក់រថយន្ដពេលយប់ផងដែរ ។

សូមបញ្ជាក់ថា គណនីហ្វេសប៊ុកឈ្មោះ បូ បញ្ញា នៅថ្ងៃទី៣០ ខែមករា ឆ្នាំ២០២៣ បានបង្ហោះថា “យប់មិញខ្ញុំដេកនៅត្រែងត្រយឹងមានចោរលួចបូមប្រេងសូមបងប្អូនតៃកុងឡានគ្នាយើងមានការប្រុងប្រយ័ត្នផង ។ ហើយសូមបងៗពូៗសមត្ថកិច្ចត្រែងត្រយឹងជួយមើលផងសូមអរគុណទុកជាមុន (បញ្ជាក់ដាវជារបស់ចោរ)” ។

ក្រោយពីទទួលបាព័ត៌មានករណីក្មេងស្ទាវធ្វើសកម្មភាពប្រើដាវ កាំបិត ដំបង និងដុំថ្ម គំរាមប្លន់បូមប្រេងពីររថយន្តធំដែលឈប់សម្រាកតាមផ្លូវបែបនេះ ស្នងការនគរបាលខេត្តកំពង់ស្ពឺ បានដាក់បទបញ្ជាដល់ជំនាញឲ្យចុះស្រាវជ្រាវឈានដល់កំណត់មុខសញ្ញាបានឈានដល់ការឃាត់ខ្លួន ចំនួន០៤នាក់ និងបក្ខពួកមួយចំនួនកំពុងគេចខ្លួន ។

បច្ចុប្បន្នសមត្ថកិច្ចបានបញ្ជូនមុខសញ្ញាទាំង០៤មកការិយាល័យព្រហ្មទណ្ឌនៃស្នងការដ្ឋាននគរបាលខេត្ដកំពង់ស្ពឺ ដេីម្បី បន្ដនីតិវិធីច្បាប់ ៕

អត្ថបទ៖ ភួង រដ្ឋា