សន្តិសុខសង្គម

ជនសង្ស័យពីរនាក់ ត្រូវសមត្ថកិច្ចស្រុកត្រាំកក់ក្របួចជាប់ ក្រោយឆក់ទូរសព្ទនារីពីរនាក់ មិនបានសម្រេច

បានផុស

២ សប្តាហ៍ មុន

នៅ

ថ្ងៃពុធ ១៩ មេសា ២០២៣

ដោយ

ជនសង្ស័យ ២ នាក់ ត្រូវប៉ូលិសស្រុកត្រាំកក់ចាប់ឃាត់ខ្លួនបានភ្លាមៗ ក្រោយធ្វើសកម្មភាពឆក់ទូរសព្ទដៃពីស្ត្រី ២ នាក់ កំពុងជិះម៉ូតូ មិនបានសម្រេច ដែលកើតឡើង កាលពីថ្ងៃទី ១៨ ខែមេសា ឆ្នាំ ២០២៣ វេលាម៉ោង ១៥ និង ០០ នាទី ចំណុចលើផ្លូវកៅស៊ូ ស្ថិតក្នុងភូមិអង្គត្នោតខាងលិច ឃុំអង្គតាសោម ស្រុកត្រាំកក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចស្រុកត្រាំកក់ បញ្ជាក់ថា ករណីនេះបង្កឡើងដោយជនសង្ស័យចំនួន ២ នាក់ ជិះម៉ូតូម៉ាកនិច ពណ៌ផ្កាឈូក លាយស គ្មានស្លាកលេខ ប្រដាប់ដោយកាំបិតក្ងុក ដែលមានឈ្មោះ ម៉ម សុខ ហៅ កែវ ភេទប្រុស អាយុ ១៨ ឆ្នាំ រស់នៅភូមិសេកយា ឃុំអង្គតាសោម និង ឈ្មោះ ថន លីហ្សា ភេទប្រុស អាយុ ១៧ ឆ្នាំ រស់នៅភូមិអង្គត្នោតខាងកើត ឃុំអង្គតាសោម។ ពួកគេបានធ្វើសកម្មភាពឆក់ទូរសព្ទដៃស្ត្រី ២ នាក់ ដែលកំពុងជិះម៉ូតូម៉ាកស្កុបពីចេញពីផ្សារអង្គតាសោម តាមផ្លូវខាងលើឆ្ពោះទៅផ្ទះវិញ តែពេលធ្វើសកម្មភាព ជនសង្ស័យយកទូរសព្ទពុំបានទេ ដោយជនរងគ្រោះប្រតោងប្រតាយយកបានវិញបណ្ដាលឲ្យដួលម៉ូតូរងរបួស។

ក្រោយកើតហេតុ លោកវរសេនីយ៍ឯក ឌុប ធីយ៉ា អធិការ នៃអធិការដ្ឋាននគរបាលស្រុកត្រាំកក់ បានចេញអន្តរាគមន៍ភ្លាមៗ ដោយឃាត់បានជនសង្ស័យទាំង ២ នាក់ ព្រមទាំងវត្ថុតាងម៉ូតូម៉ាកនិច និងកាំបិតក្ងុក ត្រង់ចំណុចភូមិសេកយា ឃុំអង្គតាសោម យកមកអធិការដ្ឋានធ្វើការសាកសួរ កសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី៕

អត្ថបទ ៖ វីរៈ