ព្រោះតែលុយ២ម៉ឺនរៀល ធ្វើឱ្យបុរសម្នាក់ ក្លាយជាឃាតក

ភ្នំពេញ  ៖  បុរសម្នាក់បានយកកាំបិតចុងស្រួចចាក់ទៅលើបុរសម្នាក់ទៀតបណ្តាលឱ្យស្លាប់យ៉ាងអាណោចអាធ័ម ក្រោយពីពួកគេអង្គុយផឹកស៊ីជុំគ្នាហើយទំនាស់រឿងលុយចំនួន២ម៉ឺនរៀលថ្លៃបញ្ចាំធុងបាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៧និង៥០នាទីថ្ងៃទី២៧ ខែឧសភា ឆ្នាំ២០២៣ នៅតាម​បណ្តោយផ្លូវបេតុង ក្នុងភូមិព្រៃព្រីងខាងជើង១ សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះដែលស្លាប់មានឈ្មោះ គីម ប្រាក់ ភេទប្រុស អាយុ៤៧ឆ្នាំ ជនជាតិខ្មែរ មុខរបររត់ម៉ូតូឌុប ស្នាក់នៅ​បន្ទប់ជួលលេខ៤B នៅកន្លែងកើតហេតុខាងលើ មានស្រុកកំណើតនៅភូមិក្រាំងដូង  ឃុំសំរោងក្រោម ស្រុកបន្ទាយមាស ខេត្តកំពត។  ចំណែកជនដៃដល់មានឈ្មោះ ប៉ុន វ៉ុន ភេទប្រុស អាយុ៣៥ឆ្នាំ ជនជាតិខ្មែរ  រស់នៅភូមិព្រៃក្មេង ឃុំមេសាង ស្រុកមេសាង ខេត្តព្រៃវែង បច្ចុប្បន្នស្នាក់នៅបន្ទប់ជួល ក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ។

តាមកាបំភ្លឺរបស់ឈ្មោះ ហ៊ុយ គន្ធា ភេទស្រីអាយុ ៥៣ឆ្នាំ ត្រូវជាប្រពន្ធជនរងគ្រោះបានឱ្យដឹងថា មុនពេលកើត​ហេតុជនរងគ្រោះនឹងជនសង្ស័យខាងលើអង្គុយផឹកស៊ីគ្នា៤នាក់ នឹងមានចាក់ធុងបាស់ច្រៀងផងដែរ។ លុះពេលបន្តិចក្រោយមកជនសង្ស័យខាងលើបានយកធុងបាសនេះមកបញ្ចាំរូបគាត់ចំនួន២ម៉ឺនរៀល បន្ទាប់មកជនសង្ស័យក៏យកលុយទៅទិញស្រាបៀផឹករួមគ្នា។ ក្រោយពីផឹកស្រាបៀអស់​ជនសង្ស័យក៏បានចេញ​ទៅវិញបាត់លុះមួយសន្ទុះក្រោយមកជនសង្ស័យក៏ត្រលប់មកវិញហើយទារយកធុងបាស់វិញ តែនាងខ្ញុំមិនឱ្យ​ដោយប្តីនាងខ្ញុំប្រាប់ថាយកលុយឱ្យគាត់នឹងឱ្យធុងបាស់វិញ ពេលនោះជនសង្ស័យក៏បានស្រែកជេរ

ប្រមាថកូនស្រីរបស់ខ្ញុំ នឹងនិយាយថា ធ្លាប់ដេកជាមួយទៀតផង ពេលនោះ ប្តីគាត់ក៏បានមកតាមហើយ​ក៏ត្រូវជនសង្ស័យយកកំបិតចាក់ស្លាប់តែម្តង។

ក្រោយពីចាក់ជនរងគ្រោះហើយ  ជនសង្ស័យក៏ទាញម៉ូតូប្រុងជិះចេញត្រូវបានប្រពន្ធជនរងគ្រោះ​ទាញបណ្ដាល​ឱ្យដួលម៉ូតូក៏រត់ចោលម៉ូតូបាត់តែម្ដង។ ចំណែកឯជនរងគ្រោះដោយត្រូវរបួសឈាមហូរច្រើនពេក​ក៏ដើរមកដេក​លើគ្រែដែលនៅមុខរោងចក្រ  រួចក៏ស្លាប់បាត់បង់ជីវិតតែម្ដងទៅ។

ក្រោយកើតហេតុ  សមត្ថកិច្ចចុះមកដល់កន្លែងកើតហេតុ ដោយយកខ្សែមកហ៊ុំព័ទ្ធជុំវិញ​និងយកប្រពន្ធរបស់ជនសង្ស័យ​និងប្រពន្ធជន​រងគ្រោះទៅសួរនាំនៅប៉ុស្តិ៍នគរបាលរដ្ឋបាលចោមចៅទី៣ ដើម្បីបន្តតាមនីតិវិធី។ ចំណែកសព​សមត្ថកិច្ចពិនិត្យ និងធ្វើកោសល្យវិច្ច័យរួចប្រគល់ឱ្យសាច់ញាតិដឹកទៅស្រុកកំណើតធ្វើបុណ្យតាមប្រពៃណី  ៕ 

ដោយ  ៖  សុខា