ឃាត់ខ្លួនអ្នកលួចគោវ័យ១៦ឆ្នាំម្នាក់ ខណៈកំពុងដឹកដើរលក់ឲ្យអ្នកស្រុក

កម្លាំងនគរបាលស្រុកថ្មគោល ខេត្តបាត់ដំបង បានឃាត់ខ្លួនយុវជនម្នាក់ក្រោយមានប្រជាបលរដ្ឋរាយការណ៍ពីសកម្មភាពដឹកគោមួយក្បាលដើរលក់ឲ្យគេក្នុងតម្លៃ៣លានរៀល។

ការឃាត់ខ្លួននេះបានធ្វើឡើងកាលពីថ្ងៃទី២៧ ខែមិថុនា ឆ្នាំ២០២៣ វេលាម៉ោង១៣និង៥៧នាទី ខណៈដែលយុវជនជាជនសង្ស័យដឹកគោ១ក្បាលដើរលក់នៅចំណុចលើប៉ាតង់ទី១ ខាងកើតបឹងថ្កូវ ភូមិប៉ោយយង់ ឃុំតាពូង ស្រុកថ្មគោល ខេត្តបាត់ដំបង ក្នុងតម្លៃ៣លានរៀល។

បើតាមរបាយការណ៍របស់ស្នងការខេត្តបាត់ដំបងបានឲ្យដឹងថា ជនសង្ស័យដែលឃាត់ខ្លួនមានឈ្មោះ ប៊ូណា បូរី ភេទប្រុស អាយុ១៦ឆ្នាំ រស់នៅភូមិគោកក្តួច ឃុំតាពូង ស្រុកថ្មគោល ខេត្តបាត់ដំបង និងបានដកហូតវត្ថុតាងសត្វគោញី​១ក្បាល សម្បុរស។

ជនសង្ស័យឆ្លើយសារភាពថា ខ្លួនបានធ្វើសកម្មភាពលួចគោ​នៅចំណុចប្រឡាយបឹងម៉ាំ ក្នុងភូមិទំពូងត្បូង ឃុំតាពូង ស្រុកថ្មគោល ខេត្តបាត់ដំបង កាលពីថ្ងៃទី២៧ ខែមិថុនា ឆ្នាំ២០២៣ វេលាម៉ោង១១និង០០នាទី ដែលជារបស់ជនរងគ្រោះឈ្មោះ ហាច តាំង ភេទប្រុស អាយុ៥៤ឆ្នាំ រស់នៅភូមិទំពូងត្បូង ឃុំតាពូង ស្រុកថ្មគោល ពិតប្រាកដមែន។

ជនសង័្សយត្រូវបានកម្លាំងនគរបាលស្រុកថ្មគោល កសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធីច្បាប់៕

អត្ថបទ៖ សុខុម