ឃាត់ខ្លួនក្រុមលួចយ៉ាងសកម្ម៩នាក់ និងម៉ូតូជាច្រើនគ្រឿងក្នុងក្រុងសៀមរាប 

កម្លាំងនគរបាលខេត្តសៀមរាប ធ្វើការឃាត់ខ្លួនជនសង្ស័យជាបន្តបន្ទាប់ចំនួន៩នាក់ និងម៉ូតូជាច្រើនគ្រឿងដែលជាប់ពាក់ព័ន្ធនឹងករណីលួច។

លោកវរសេនីយ៍ឯក នួន ស័ក្ដិចំរើនរិទ្ធ ស្នងការរងទទួលផែនការងារនគរបាលព្រហ្មទណ្ឌ ខេត្តសៀមរាប បានឱ្យដឹងថា ដោយទទួលបានការចង្អុលបង្ហាញពីថ្នាក់ដឹកនាំ កម្លាំងនគរបាលខេត្តសៀមរាបបានសហការគ្នាធ្វើប្រតិបត្តិការស៊ើបអង្គេត និងស្រាវជ្រាវករណីអំពើលួច (លួចម៉ូតូ) យ៉ាងសកម្មនៅក្នុងក្រុង ខេត្តសៀមរាប និងឃាត់ខ្លួនជនសង្ស័យបានសរុបចំនួន០៩នាក់។

លោកបន្តថា ក្រោយពីធ្វើការសាកសួរ ជនសង្ស័យបានឆ្លើយសារភាពថា បក្ខពួកខ្លួនបានប្រព្រឹត្តអំពើ (លួចម៉ូតូ )ក្នុងក្រុងសៀមរាប បានម៉ូតូចំនួន១០គ្រឿង ក្នុងពេលធ្វើសកម្មភាពលួចម៉ូតូបានបក្ខពួកខ្លួនបានយកទៅលក់បន្តនៅខេត្តកំពង់ធំ។

បន្ទាប់មកនៅថ្ងៃទី១៧ ខែកក្កដា ឆ្នាំ២០២៣ វេលាម៉ោង១៧និង៥០នាទី កម្លាំងនគរបាលផែនព្រហ្មទណ្ឌ នៃស្នងការដ្ឋាន​នគរបាលខេត្តសៀមរាប បានសហការណ៍ជាមួយកម្លាំងអធិការដ្ឋាននគរបាលស្រុកស្ទោង នៃស្នងការដ្ឋាននគរបាលខេត្តកំពង់ធំ បានបន្តការស្រាវជ្រាវ និងឃាត់ខ្លួនជនសង្ស័យបានចំនួន០២នាក់។

លោកបន្ថែមថា វត្ថុតាងដកហូតសរុបក្នុងកិច្ចប្រតិបត្តិការណ៍បានម៉ូតូចំនួន០៧គ្រឿង (ស្រាវជ្រាវឃើញម្ចាស់ចំនួន០៥គ្រឿង) ដែលជាម៉ូតូជនសង្ស័យលួចបាន និងទូរស័ព្ទដៃចំនួន០២គ្រឿង ។

ជនសង្ស័យទាំងអស់រួមទាំងវត្ថុតាងត្រូវបានកំលាំងសមត្ថកិច្ចកំពុងរៀបចំកសាងសំណុំរឿង និងបញ្ជូនខ្លួនទៅតុលាការដើម្បីបន្តនីតិវិធីនិងផ្តន្ទាទោសតាមផ្លូវច្បាប់៕

អត្ថបទ៖ កុសល