អ្នកនេសាទបង់សំណាញ់ជាប់ក្រពើក្នុងស្ទឹងស្នៀត អាជ្ញាធរហាមពលរដ្ឋចុះលេងទឹក

អាជ្ញាធរក្រុងសិរីសោភ័ណប្រាប់ឱ្យប្រជាពលរដ្ឋ​មានការប្រុងប្រយ័ត្នបន្ទាប់ពីប្រជានេសាទបង់សំណាញ់រកត្រីក្នុងស្ទឹងជាប់សត្វក្រពើ ស្ថិនៅក្នុងស្ទឹងស្នៀត សង្កាត់ស្នៀត ក្រុងសិរីសោភ័ណ ខេត្តបន្ទាយមានជ័យកាលពីថ្ងៃទី ៣០ ខែកក្កដា​២០២៣។

លោក ហូត សាវី ចៅសង្កាត់ស្នៀត ប្រាប់សារព័ត៌មានថា បុរសដែលបង់សំណាញ់ជាប់ក្រពើមានឈ្មោះ ជីម លី អាយុ ២៦ឆ្នាំ រស់នៅភូមិខាងលើ នៅពេលបង់សំណាញ់ជាប់ក្រពើ គឺមានប្រជាពលរដ្ឋ ៤ ទៅ៥នាក់បានទៅរកបង់សំណាញ់ចាប់ត្រីនៅដងស្ទឹងស្នៀត។

ក្រពើ១ក្បាលខាងលើមានទម្ងន់ជិត ៥ គីឡូក្រាម។ តាមការសន្និដ្ឋានក្រពើដែលជាប់សំណាញ់អាចជាក្រពើចេញពីអាងចិញ្ចឹមអំឡុងពេលទឹកលិចនៅឆ្នាំ២០២២។

ក្រៅពីការព្រួយបារម្យរបស់អាជ្ញាធរនាយខណ្ឌរដ្ឋបាលជលផលខេត្តបន្ទាយមានជ័យក៏បានឱ្យដឹងថា ដោយសារតែយើងមិនដឹងប្រភព ឬចំនួនសត្វក្រពើមានប៉ុន្មានមកពីណាដូចនេះសូមអំពាវនាវឱ្យបងប្អូនប្រជាពលរដ្ឋរស់នៅតាមដងស្ទឹង ឬអ្នកនិយមលេងទឹកស្ទឹងមានការប្រុងប្រយ័ត្នកុំចុះលេងទឹកអាចគ្រោះថ្នាក់ដោយសត្វក្រពើខាំ។

ក្រោយពីទទួលព័ត៌មាននេះហើយលោកនឹងឱ្យខាងសហគមន៍ស្រាវជ្រាវហើយបើឃើញមានទៀតជំនាញនឹងចុះចាប់៕

អត្ថបទ៖ អពៅ