សាក្សី៖ ជនសង្ស័យមានគ្នាបីនាក់​ធ្វើសកម្មភាពសម្លាប់ប្តីប្រពន្ធ​នៅរោងទាក្រោមផ្ទះ

ប្រភពនៅកន្លែងកើតហេតុ បានឱ្យដឹងថា ជនសង្ស័យដែលធ្វើសកម្មភាពសម្លាប់ប្តីប្រពន្ធ នៅក្នុងរោងទាក្រោមផ្ទះ​ជនរងគ្រោះ មានគ្នីគ្នាចំនួនបីនាក់ ប្រដាប់ដោយអាវុធ។

ប្រភពដដែលបាននិយាយថា នៅមុនកើតហេតុ ព្រលប់ថ្ងៃទី១១ ខែសីហា ឆ្នាំ២០២៣ ជនរងគ្រោះទាំង០២នាក់ ប្តីប្រពន្ធ បានសម្រាកលើគ្រែ ក្រោមផ្ទះរបស់ខ្លួនដូចសព្វដង។

ចំណែកឈ្មោះ ស៊ាន់ សេងហ័ង ភេទប្រុស អាយុ១៩ឆ្នាំ ត្រូវជាកម្មករដើរប្រមូលពងទា ក៏ដេកនៅលើគ្រែមួយទៀត ក្បែរគ្រែជនរងគ្រោះផងដែរ។ សាក្សីបានឱ្យដឹងថា ពេលកើតហេតុ បានឃើញមានជនសង្ស័យ៣នាក់(មិនស្គាល់ឈ្មោះ)ដោយម្នាក់ ស្លៀកពាក់អាវយឺតដៃខ្លី ពណ៌ប៉ារ៉ា ពាក់មួកស៊ីវិល(ឆាង) កាន់អាវុធវែង មកបាញ់សម្លាប់ជនរង​គ្រោះ​ចំនួន៩គ្រាប់ បង្កការភ្ញាក់ផ្អើល នៅក្រោមផ្ទះជនរងគ្រោះ ស្ថិតនៅភូមិថ្មី ឃុំសន្លុង ស្រុកខ្សាច់កណ្តាល ខេត្តកណ្តាល កាលពី វេលាម៉ោង០៣ និង៣០នាទី ព្រឹកថ្ងៃទី១២ ខីសីហា ឆ្នាំ ២០២៣។

ជនរងគ្រោះទី១. ឈ្មោះ ម៉ុច ម៉ៅ ភេទប្រុស អាយុ៤៧ឆ្នាំជនជាតិ មុខរបរចិញ្ចឹមសត្វទា និងលក់ចំណីសត្វ នៅភូមិឃុំកើតហេតុ(ប្ដីស្លាប់)។ ទី២. ឈ្មោះ គល់ ហ៊ាន់ ភេទស្រី អាយុ៤៥ឆ្នាំ ជនជាតិខ្មែរ (ប្រពន្ធស្លាប់)។

ក្រោយកើតហេតុ សមត្ថកិច្ចបានប្រមូលសំបកគ្រាប់កាំភ្លើងចំនួន០៩គ្រាប់ និងក្បាលគ្រាប់កាំភ្លើងចំនួន០៣គ្រាប់។ បើតាមការសន្និដ្ឋាន(បឋម)ខ្មាន់កាំភ្លើង ប្រើអាវុធវែងAK សម្រាប់បាញ់សម្លាប់ ជនរងគ្រោះ។

លោកឧត្ដមសេនីយ៍ទោ ឈឿន សុចិត្ត ស្នងការខេត្តកណ្ដាល បានបញ្ជាក់ប្រាប់អ្នកសាព័ត៌មានថា នៅពេលនេះ សមត្ថកិច្ចមិនទាន់អាចកំណត់មុខសញ្ញាបាននៅឡើយ ប៉ុន្តែកំពុងធ្វើការស្រាវជ្រាវយ៉ាងយកចិត្តទុកដាក់បំផុត លើករណីឃាតកម្ម ដ៏សាហាវមួយនេះ។

គួរ​បញ្ជាក់​ថា កាលពី​ប៉ុន្មានឆ្នាំមុន ក្រុម​គ្រួសារ​ជនរងគ្រោះ ក៏​ត្រូវ​បាន​គេ​កាប់​សុសសាច់​ទាំង​យប់ ស្ទើរ​ស្លាប់ នៅ​ក្នុង​ទ្រង់​ទា របស់​ជនរងគ្រោះ ស្ថិតនៅ​ភូមិ​-​ឃុំ​ខាងលើ ដោយ​រហូត​មក​ទល់​ពេល​នេះ ពុំ​ទាន់​រក​មុខ​ជន​ដៃដល់​ឃើញ​នៅឡើយ ស្រាប់​តែ​ពេលនេះ​ត្រូវ​ខ្មាន់​កាំភ្លើង​មក​បាញ់​សម្លាប់ បណ្ដាល​ឲ្យ​ស្លាប់​ទាំង ២ នាក់​តែម្ដង​៕