មន្ត្រីជលផលខេត្តពោធិ៍សាត់ ប្រើកាំភ្លើងភ្ជង់ប្រជានេសាទក្នុងខេត្តបាត់ដំបង

ប្រជានេសាទប្រមាណ ៣ ទូក ដែលកំពុងរាយស្បៃមងនៅលើផ្ទៃទឹកក្នុងដែនដីខេត្តបាត់ដំបង ត្រូវបានកម្លាំងជលផលខេត្តពោធិ៍សាត់ប្រើប្រាស់កាំភ្លើងភ្ជង់គម្រាមចាប់បញ្ជូនទៅតុលាការ។

កាលពីថ្ងៃទី ១៩ ខែសីហា កន្លងទៅថ្មីៗនេះ មានមន្ត្រីជលផលមួយក្រុម ដែលឈរជើងនៅចំណុច ព្រែកក្រ ក្នុងទឹកដីខេត្ត ពោធិ៍សាត់បានសហការជាមួយកម្លាំងសឹករង ប្រើប្រាស់កាណូតស្មាច់ចុះដេញចាប់ប្រជានេសាទ​ ដែលកំពុងរាយមកនៅចំណុចក្បាលតោល លើទឹកដីឃុំកោះជីវាំង ស្រុកឯកភ្នំ ខេត្តបាត់ដំបង។

មន្ត្រីទាំងនោះបានប្រើប្រាស់កាំភ្លើងភ្ជង់ទៅលើប្រជានេសាទ ដោយគម្រាមថានឹងចាប់បញ្ជូនទៅតុលាការ ក្នុងនោះគេសង្គេតឃើញមានមន្ត្រីជលផលចប់កិច្ចសន្យាម្នាក់ផងដែរ។ អ្នកគម្រាមពលរដ្ឋគឺឈ្មោះ ហេង លីហ៊ាង។

ជុំវិញបញ្ហាបំពានដែនដីនេះ លោក ជុំ និមល នាយខណ្ឌជលផលខេត្តពោធិ៍សាត់ បានមានប្រសាសន៍ថា លោកមិនបានអនុញ្ញាតឱ្យមន្ត្រីណាមួយប្រើប្រាស់អាវុធនោះទេ ហើយការដែលចុះបង្ក្រាបបទល្មើសហួសពីដែនកំណត់ ខុសពីលិខិតបេសកកម្ម បើបុគ្គលណាប្រព្រឹត្តគឺបុគ្គលនោះជាអ្នកទទួលចុះ។

ដោយឡែកលោកនាយផ្នែក លឹម សុក្រឹត ក៏បានទទួលស្គាល់ដែរអំពីការប្រើប្រាស់កាំភ្លើងភ្ជង់ទៅលើប្រជានេសាទ ដែលជាសិទ្ធិការពារខ្លួន ព្រោះពេលនោះក្រុមប្រជានេសាទបានទាញកាំបិតដេញពួកខ្លួន។

អត្ថបទ៖ សោ និយមរ័ត្ន