សន្តិសុខសង្គម

សមត្ថកិច្ចឃាត់ខ្លួនក្រុមក្មេងទំនេីង១២នាក់ ដែលបង្ហោះម៉ូតូលេីផ្លូវជាតិលេខ៦ ក្នុងស្រុកជេីងព្រៃ

បានផុស

៣ years មុន

នៅ

ថ្ងៃអាទិត្យ ៣ កញ្ញា ២០២៣

ដោយ

កងកម្លាំងសមត្ថកិច្ចនគរបាលស្រុកជើងព្រៃ ខេត្តកំពង់ចាម នៅព្រឹក ថ្ងៃទី០៣ ខែកញ្ញា ឆ្នាំ២០២៣ បានចុះបង្ក្រាប និងឃាត់ខ្លួនក្រុមក្មេងទំនើងដែលបានធ្វើសកម្មភាពបង្ហោះម៉ូតូ និងបានកែច្នៃស៊ីមាំងបំពងសំឡេងខុសលក្ខណៈបច្ចេកទេស ដែលធ្វើឲ្យប៉ះពាល់សណ្តាប់សង្គម និងរំខានដល់បងប្អូនប្រជាពលរដ្ឋរស់នៅ និងធ្វើដំណើរតាមបណ្តោយផ្លូវជាតិលេខ៦ ចំណុចនៅភូមិឈើទាល ឃុំផ្តៅជុំ ស្រុកជើងព្រៃ ខេត្តកំពង់ចាម។

សមត្ថកិច្ចស្រុកជើងព្រៃ បានឲ្យដឹងថា កម្លាំងអធិការនគរបាលស្រុកជើងព្រៃ បានធ្វើការស្ទាក់ឃាត់ក្រុមក្មេងៗបានចំនួន១២នាក់ រួមទាំងម៉ូតូដែលបានកែច្នៃស៉ីមាំងខុសបច្ចេកទេស១២គ្រឿងផងដែរ។ សមត្ថកិច្ចឃាត់ខ្លួនក្រុមក្មេងៗទាំងនោះ ដើម្បីយកមកកាន់អធិការនគរបាលស្រុកជើងព្រៃ ធ្វើការសាកសួរ និងត្រួតពិនិត្យឆែកឆេទៅលើម៉ូតូ និងសម្ភារៈជាប់នឹងខ្លួនក្រុមក្មេងទាំង១២នាក់។ ជាលទ្ធផល ឃើញថា ពុំមានឧបករណ៍សម្រាប់ប្រព្រឹត្តបទល្មើសឡើយ។ ទន្ទឹមនឹងនេះដែរ សមត្ថកិច្ច ក៏បានធ្វើតេស្ត ពិនិត្យរកសារធាតុញៀនលើក្រុមក្មេងៗទាំង១២នាក់ ជាលទ្ធផល អវិជ្ជមាន ទាំង១២នាក់។

សមត្ថកិច្ចស្រុកជើងព្រៃ បានបញ្ជាក់ទៀតថា តបតាមបទបញ្ជារបស់ឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានសម្រេចឲ្យធ្វើការអប់រំ កុំឲ្យមានធ្វើសកម្មភាពបែបនេះតទៅទៀត និងដោះដូរស៊ីមាំងដែលមានខុសលក្ខណៈបច្ចេកទេសចេញ៕

អត្ថបទនិងរូបភាព៖ឡេកចាន់ពេជ្រ