បង្ក្រាប​ឈ្មួញដាក់ស្បៃមុង​ក្រសោបយកកូនត្រីចម្រុះ​នៅទំនប់ស្ទាក់ទឹកសាលាតាអន

នៅរសៀលថ្ងៃទី២២ ខែតុលា ឆ្នាំ២០២៣ នេះ លោក ជួង សុភា នាយខណ្ឌរដ្ឋបាលជលផលបាត់ដំបងបានឲ្យដឹងថា ករណីដែលមានឈ្មួញលួចដាក់ស្បៃមុង ក្រសោបយកកូនត្រីចម្រុះដោយខុសច្បាប់នៅចំណុចក្បាលទំនប់ទឹកសាលា តាអន ត្រូវបានបង្ក្រាបក្នុងនោះក៏បានបង្ក្រាប២ករណីផ្សេងទៀតនៅផ្នែកខាងលើនិងផ្នែកខាងក្រោមនៃទំនប់។

ការចុះ​បង្ក្រាបធ្វើឡើងក្រោយបែកធ្លាយពីអ្នកភូមិខណះដែលឈ្មួញហាមមិនឲ្យអ្នកស្រុកភូមិបានបង់សំណាញ់​ធ្វើនេសាទជាប្រពៃណី សម្រាប់​ដោះស្រាយម្ហូបប្រចាំថ្ងៃដែល​មិនបំផ្លាញធនធានមច្ឆាជាតិដូចប្រើប្រាស់ស្បៃមុងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណី​ឈ្មួញ​ដាក់​ស្បៃមុង​បានប្រព្រឹត្តឡើងតាំងពីឆ្នាំ២០២២ តែគ្មានមន្ត្រីណាមកបង្ក្រាបទើបអ្នកភូមិក្តៅក្រហាយរឿង​ហាមពួកគាត់មិនឲ្យបង់សំណាញ់ ទើបបង្ហើបករណីនេះមកឲ្យកម្ពុជាថ្មីចុះផ្សាយ ទើបមានការបង្ក្រាបតែម្តងដោយពួកគាត់ប្រាប់ថា បទល្មើសនេះមួយថ្ងៃៗបានកូនត្រីមិនក្រោម ១ តោនឡើយ ក្នុងរយះពេលជាង ១ ឆ្នាំមកនេះស្ទើរដាច់ពូជកូនត្រីគ្រប់ប្រភេទ ទម្រាំមានការបង្ក្រាបនៅពេលនេះ។

លោក ជួង សុភា នាយខណ្ឌរដ្ឋបាលជលផលបាត់ដំបងបន្តឲ្យដឹងថា សកម្មភាពបង្ក្រាបបទល្មើសធនធានធម្មជាតិស្ថិត​ក្នុងភូមិសាស្ត្រចំណុចទំនប់សាលាតាអន ឃុំព្រែកនរិន្ទ ស្រុកឯកភ្នំ ចំណុចខាងលើដៃស្ពង់ និងខាងក្រោមរបុញអង្កាំ ក្នុង ស្រុកថ្មគោល ខេត្តបាត់ដំបង។

បទល្មើសនេះ បានប្រើឧបករណ៍នេសាទខុសពីការកំណត់របស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយឧបករណ៍ស្បៃមុងទាំង ៣ ករណីដែលត្រូវបានបង្ក្រាប។

លោកបញ្ជាក់ថា ក្នុងការចុះបង្ក្រាបនេះ មន្ត្រីជំនាញបានសហការជាមួយ កម្លាំងអាវុធហត្ថខេត្តសរុប ០៧ នាក់ និងមធ្យោបាយកាណូត ០២គ្រឿង។ លទ្ធផលនៃការបង្ក្រាបទាំង ៣ ករណី បានកាប់បំផ្លាញចោលសាច់អួនប្រវែង ១ ២០០​ម៉ែត្រ ,បង្គោលចំនួន ៩៣០ ដើម, ឡុកចំនួន ០៥ គ្រឿង ,លូស្បៃមុង ០៥ មាត់ និង ត្រីចម្រុះចំនួន ២០គីឡូក្រាម បានព្រលែងឲ្យមានសេរីភាព៕

អត្ថបទ៖ សៅ សារិទ្ធ