ចាប់ខ្លួនអនុប្រធានមន្ទីរប្រឆាំងគ្រឿងញៀនម្នាក់ និងមន្ត្រី៤នាក់បញ្ជូនទៅតុលាការ ពាក់ព័ន្ធទទួលសំណូក

កាលពីព្រឹកថ្ងៃទី១០ ខែវិច្ឆិកា ឆ្នាំ២០២៣ នៅសាលាដំបូងរាជធានីភ្នំពេញ គេឃើញរថយន្ត២គ្រឿង និងម៉ូតូជូនដំណើរ៣ទៅ៤ គ្រឿង ជាកងកម្លាំងនាយកដ្ឋានប្រឆាំងចារកម្ម នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានចាប់បញ្ជូនអនុប្រធានមន្ទីរប្រឆាំងគ្រឿងញៀនម្នាក់ លោក វ៉ាន់ កុសល និងមន្ត្រីនគរបាលក្រោមឱវាទ៤នាក់ មកតុលាការពាក់ព័ន្ធ និងបទល្មើសទទួលសំណូក។

បើតាមអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា “សំណុំរឿងហ្នឹងបានដល់ស្ថាប័នអយ្យការហើយ ប៉ុន្តែតាំងពីព្រឹករហូតមកដល់រសៀលថ្ងៃនេះ នៅមិនទាន់បានចាត់ទៅព្រះរាជអាជ្ញារងណា ឲ្យបើកការស៊ើបសួរនៅឡើយទេ”។

ក៏ប៉ុន្តែ បើតាមព័ត៌មានលេចឭមិនទាន់ផ្លូវការបានបង្ហើបឲ្យដឹងថា ២.៣ថ្ងៃមុននេះ នាយកដ្ឋានប្រឆាំងចារកម្ម បានឃាត់ខ្លួនជាបន្ត បន្ទាប់មានមន្ត្រី និងអនុប្រធានការិយាល័យទី៨ នៃមន្ទីរប្រឆាំងគ្រឿងញៀន៤នាក់ ពាក់ពន្ធករណី ទទួលសំណូកពីជនជាតិចិន ក្នុងបទល្មើសជួញដូរគ្រឿងញៀន រួចដោះលែងឲ្យមានសេរីភាពវិញ។

បន្ទាប់ពីឃាត់ខ្លួនមន្ត្រីនគរបាល និងអនុប្រធានការិយាល័យមក សមត្តកិច្ចនគរបាលនាយកដ្ឋានប្រឆាំងចារកម្មបានឈានទៅឃាត់ខ្លួនលោកឧត្តមសេនីយ៍ទោ វ៉ាន់ កុសល អនុប្រធានមន្ទីរប្រឆាំងគ្រឿងញៀនទទួលបន្ទុកការិយាល័យទី៨។

ក្រោយពីឃាត់ខ្លួនមន្ត្រីនគរបាលនៃមន្ទីរប្រឆាំងគ្រឿងញៀនខាងលើ ទើបសំណុំរឿងត្រូវបានបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់៕

អត្ថបទដោយ៖មករា