ឃាត់ខ្លួនជនជាតិ២នាក់ ពាក់ព័ន្ធករណីបង្ខាំងមនុស្ស និងជំរិតទារប្រាក់

កម្លាំងនគរបាលការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងអធិការដ្ឋាននគរបាលខណ្ឌពោធិ៍សែនជ័យ និងកម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ បានស្រាវជ្រាវឃាត់ខ្លួនជនសង្ស័យជាជនជាតិចិនចំនួន២នាក់ ក្នុងចំណោមបក្ខពួក៣នាក់ ពាក់ព័ន្ធករណីចាប់ឃុំឃាំង និងបង្ខាំងដោយខុសច្បាប់ និងជំរិតទារប្រាក់នៅក្នុងបុរីញូថោន។

ការឃាត់ខ្លួននេះបានធ្វើឡើងកាលពីវេលាម៉ោង១៦និង៤៥នាទី ថ្ងៃទី១៤ ខែវិច្ឆិកា ឆ្នាំ២០២៣ នៅចំណុចកែងផ្សាររតនាផ្លាហ្សា ផ្លូវបេតុង សង្កាត់ទឹកថ្លា ខណ្ឌសែនសុខ រាជធានីភ្នំពេញ។

តាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រឹកថ្ងៃទី១៦វិច្ឆិកានេះថា ជនសង្ស័យដែលឃាត់ខ្លួនមានឈ្មោះ WENG SHENGFENG ភេទប្រុស ជនជាតិចិន មុខរបរអាជីវករ ស្នាក់នៅផ្ទះឃ្លាំងជួលគ្មានលេខ ផ្លូវបេតុង ភូមិព្រៃសាលា សង្កាត់កាកាប២ ខណ្ឌពោធិសែនជ័យ។ ឈ្មោះ ZHANG YAN ភេទប្រុស ជនជាតិចិន មុខរបរ អ្នកបើកបររថយន្ត ស្នាក់នៅផ្ទះឃ្លាំងជួលគ្មានលេខ ផ្លូវបេតុង ភូមិព្រៃសាលា សង្កាត់កាកាប២ ខណ្ឌពោធិសែនជ័យ។ ក្នុងប្រតិបត្តិការឃាត់ខ្លួននេះកម្លាំងបានដកហូតរថយន្ដចំនួន២គ្រឿង និងវត្ថុតាងពាក់ព័ន្ធមួយចំនួន។

របាយការណ៍បញ្ជាក់ថា ក្រុមជនសង្ស័យបានធ្វើសកម្មភាពចាប់បង្ខាំងដោយខុសច្បាប់ និងជំរិតទារប្រាក់លើជនរងគ្រោះកាលពីថ្ងៃទី២ ខែវិច្ឆិកា ឆ្នាំ២០២៣ នៅចំណុចបុរីញូថោន ផ្លូវបេតុង ភូមិព្រៃទា១ សង្កាត់ចោមចៅ៣ ខណ្ឌពោធិសែនជ័យ ហើយការបង្ក្រាបនេះបានធ្វើឡើងតាមរយៈការពិនិត្យកាមេរ៉ាសុវត្ថិភាពនៅកន្លែងកើតហេតុឈានដល់ឃាត់ខ្លួនជនសង្ស័យចំនួន០២នាក់ ខណៈម្នាក់ទៀតកំពុងគេចខ្លួន។

ក្នុងករណីនេះ បើតាមសមត្ថកិច្ចបញ្ជាក់ថា សម្ភារបាត់បង់មានប្រាក់ដុល្លារអាមេរិកចំនួន ៦៤០០ដុល្លារ និងទូរសព្ទ័ដៃម៉ាកអាយហ្វូន១៣មួយគ្រឿង។ ជនសង្ស័យ និងវត្ថុតាងត្រូវបានកម្លាំងជំនាញការិយាល័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕