នគរបាលព្រហ្មទណ្ឌ កំពុងបើកការស្រាវជ្រាវករណីជនស៊ីវិលម្នាក់ ដកកាំភ្លើងគំរាមពលរដ្ឋហើយអះអាងថា «ជានគរបាលព្រហ្មទណ្ឌក្រសួង»

បន្ទាប់ពីមានការចែករំលែកនូវរូបភាពវីដេអូពីសកម្មភាពបុរសម្នាក់ដកកាំភ្លើងអាម៉េគំរាមប្រជាពលរដ្ឋ និងអះអាងថា ជានគរបាលព្រហ្មទណ្ឌក្រសួង នៅព្រឹកថ្ងៃទី៧ ខែធ្នូ ឆ្នាំ២០២៣នេះ នាយកដ្ឋាននគរបាលព្រហ្មទណ្ឌបាននឹងកំពុងបើកការស្រាវជ្រាវយ៉ាងយកចិត្តទុកដាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមនាយកដ្ឋាននគរបាលព្រហ្មទណ្ឌ ក្នុងករណីរកឃើញថា បុគ្គលនេះជាមន្ដ្រីរបស់នាយកដ្ឋាននគរបាលព្រហ្មទណ្ឌមែននោះ នាយកដ្ឋានមិនគាំទ្រជាដាច់ខាតចំពោះការប្រព្រឹត្តបែបនេះ ដោយនឹងសុំគោលការណ៍ថ្នាក់ដឹកនាំ អនុវត្តវិន័យកងកម្លាំង។ តែបើស្រាវជ្រាវរកឃើញថា បុគ្គលនេះមិនមែនជាកងកម្លាំង ហើយយកឈ្មោះអង្គភាព នាយកដ្ឋាននគរបាលព្រហ្មទណ្ឌ ទៅប្រើប្រាស់ប្រព្រឹត្តសកម្មភាពបែបនេះ នាយកដ្ឋាននឹងចាត់វិធានការតាមផ្លូវច្បាប់យ៉ាងតឹងរឹងបំផុត និងឲ្យរហ័សជាទីបំផុត។

នាយកដ្ឋាននគរបាលព្រហ្មទណ្ឌ ក៏បានកអំពាវដល់សាធារណៈជន ឬបណ្ដាញព័ត៌មានផ្ដល់ព័ត៌មានបន្ថែមពាក់ព័ន្ធករណីនេះ ឬអត្ដសញ្ញាណរបស់បុគ្គលខាងលើ មកកាន់នាយកដ្ឋាននគរបាលព្រហ្មទណ្ឌ ដើម្បីងាយស្រួលក្នុងការស្រាវជ្រាវ និងមានមូលដ្ឋានបន្ថែមដើម្បីចាត់ការតាមផ្លូវច្បាប់៕

អត្ថបទ៖ សុខុម