​សមត្ថកិច្ច​ចម្រុះ ៣ ខេត្ត ចុះបង្ក្រាបរបាំងសាច់អួនជិត ៧ ០០០ ម៉ែត្រ​

សមត្ថកិច្ចចម្រុះ ៣ ខេត្តដឹកនាំដោយលោក ប៉ែន ផល្លិកា អនុរដ្ឋលេខាធិការក្រសួងកសិកម្ម និងលោក សុង ហុង អនុប្រធានរដ្ឋបាលជលផល រួមជាមួយអធិការដ្ឋានរដ្ឋបាលជលផលខាងត្បួង និងខាងជើងបឹងទន្លេសាប ខណ្ឌរដ្ឋបាលជលផលខេត្តកំពង់ឆ្នាំង ខេត្តពោធិ៍សាត់ និងខេត្តកំពង់ធំ និងអាវុធហត្ថចម្រុះប្រចាំបឹងទន្លេសាប កម្លាំងសរុប ៦៧នាក់ និងមធ្យោ​បាយ កាណូត ១៥ គ្រឿង នៅថ្ងៃទី១៧ ខែធ្នូឆ្នាំ ២០២៣ បានចុះបង្ក្រាបបទល្មើសនេសាទនៅចំណុចព្រំប្រទល់ ៣ខេត្ត។

លោក លី ឡា នាយខណ្ឌរដ្ឋបាលជលផលកំពង់ឆ្នាំង ដែលបានចុះសហការក្នុងកិច្ចប្រតិបត្តិការបង្ក្រាបបទល្មើសនេ​សាទ​​នៅព្រំប្រទល់ ៣ ខេត្តខាងលើនេះនៅរសៀលថ្ងៃទី ១៨ ខែធ្នូនេះ បានឱ្យដឹងថា លទ្ធផលក្នុងកិច្ចប្រតិបត្តិការនេះសម្រេចបានរុះរើរបាំងសាច់អួនចំនួន ២៤កន្លែង ប្រវែង ៦ ៩០០ ម៉ែត្រ លបលូសាច់អួន ២៤ មាត់ បង្គោលចំនួន ៦៥០ ដើម និង​ចាក់លែងត្រីចំនួន ២៦០ គីឡូក្រាមចូលក្នុងទន្លេធម្មជាតិវិញ។

លោក លី ឡា បានបញ្ជាក់ឲ្យដឹងទៀតថា សមត្ថកិច្ចចម្រុះទាំងបីខេត្តខាងលើនេះនឹងបន្តចុះបង្ក្រាបបទល្មើសនេសាទ​រយៈពេល ៥ ថ្ងៃ បន្ថែមទៀត៕

អត្ថបទ៖ ឈៀងថារិទ្ធ