ឃាត់ខ្លួនបានហើយ! ភេទទី៣ម្នាក់ និងសិស្សសាលាមួយក្រុមដែលវាយលើសិស្សស្រីម្នាក់

នៅរាត្រីថ្ងៃទី០៤ ខែមករា ឆ្នាំ២០២៤នេះ ស្នងការដ្ឋាននគរបាលរាជធានីភ្នំពេញបានឃាត់ខ្លួនសិស្សសាលាមួយក្រុម ក្នុងនោះមានភេទទី៣ម្នាក់ និងសិស្សស្រីចំនួន ៣នាក់ឯទៀតបានហើយ ។

សមត្ថកិ​ច្ចបានតាមឃាត់ខ្លួនពួកគេនៅត្រង់ចំណុចរង្វង់មូលវាលរេញ ស្រុកព្រៃនប់ ខេត្តព្រះសីហនុ។ ជាមួយគ្នានេះ សមត្ថកិច្ចបាននឹងកំពុងដឹកពួកកេមកកាន់ស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធីច្បាប់បន្តទៀត។

ការណ៍ចាប់ឃាត់ខ្លួននេះ ធ្វើឡើងក្រោយមានការចែកចាយវីដេអូពាសពេញបណ្ដាញសង្គម ជុំវិញសកម្មភាពសិស្សសាលាដែលជាភេទទី៣ និងបក្សពួក បានប្រើប្រាស់អំពើហិង្សាទៅលើសិស្សស្រីម្នាក់ រួមជាមួយនឹងពាក្យសម្ដីមិនសមរម្យមិនសមនឹងសម្លៀកសិស្សសាលាដែលកំពុងពាក់ទាល់តែសោះ។

ក្រោយវីដេអូសកម្មភាពប្រើប្រាស់អំពើហិង្សានេះ ត្រូវបានគេយកទៅចែកចាយពាសពេញបណ្ដាញសង្គមហ្វេសប៊ុកមហាជន ជាពិសេសអ្នកដែលប្រើប្រាស់បណ្ដាញសង្គមហ្វេសប៊ុកបានផ្ទុះការរិះគន់ព្រោងព្រាត ដោយចាត់ទុកថាទង្វើនេះជាទង្វើអសីលធម៌ ខ្វះគុណធម៌ ទង្វើមិនសមជាខ្លួនជាសិស្ស ទង្វើមិនសមជាទំពាំងស្នងឬស្សីទាល់តែសោះ។

ជាការកត់សម្គាល់ លើសពីការរិះគន់ទៅទៀត សាធារណមតិបានសំណូមពរឱ្យសមត្ថកិច្ចអនុវត្តន៍ច្បាប់ឱ្យតឹងរ៉ឹងជាទីបំផុតលើក្រុមក្មេងទំនើងមួយក្រុមនេះ ដើម្បីកុំឱ្យដំបៅដែលកើតចេញពីក្រុមក្មេងទំនើងមួយនេះកើតជាមហារីក ឆ្លងរីករាលប៉ះពាល់ទៅដល់យុវជនខ្មែរឯទៀត៕