អស់លទ្ធភាពចិញ្ចឹមចៅ ស្ត្រីវ័យ៦៤ឆ្នាំសម្លាប់ចៅបង្កើតខ្លួនឯងយកទៅកប់នឹងគំនរថ្ម

ស្រ្តីវ័យ៦៤ឆ្នាំម្នាក់ត្រូវបានកម្លាំងនគរបាលការិយាល័យព្រហ្មទណ្ឌកម្រិតធ្ងន់ ដឹកនាំសហការជាមួយស្នងការដ្ឋាននគរបាលខេត្តកំពង់ស្ពឺ និងអង្គការ CPU ធ្វើការឃាត់ខ្លួនបន្ទាប់ពីសារភាពថា បានសម្លាប់ចៅប្រុសបង្កើតខ្លួនឯងអាយុ៨ឆ្នាំ ដោយសារអស់លទ្ធភាពចិញ្ចឹម។

ស្ត្រីជនដៃដល់មានឈ្មោះ ម៉ុម រឿន អាយុ៦៤ឆ្នាំ ជនជាតិខ្មែរ រស់នៅភូមិអូនាងហីង ឃុំតាំងក្រូច ស្រុកសំរោងទង ខេត្តកំពង់ស្ពឺ។ ចំណែកចៅប្រុសរងគ្រោះមានឈ្មោះ វណ្ណឌី វីរៈ អាយុ៨ឆ្នាំ។

យោងតាមរបាយការណ៍របស់អគ្គស្នងការដ្ឋាននគរបាលជាតិ កាលពីថ្ងៃទី១៤ ខែមករា ឆ្នាំ២០២៤ វេលាម៉ោង១៧​និង៣០នាទី ស្ត្រីជនដៃដល់បានប្តឹងសមត្ថកិច្ចពីករណីបាត់ចៅប្រុសឈ្មោះ វណ្ណឌី វីរៈ នៅចំណុចភូមិអូនាងហីង ឃុំតាំងក្រូច ស្រុកសំរោងទង ខេត្តកំពង់ស្ពឺ។ លុះថ្ងៃទី២៣ ខែមករា ឆ្នាំ២០២៤ វេលាម៉ោង១៦និង៣០នាទី មានពលរដ្ឋប្រទះឃើញក្មេងប្រុសឈ្មោះ វីរៈ ដេកស្លាប់ដោយមានថ្មសង្កត់ពីលើ ស្ថិតនៅជើងភ្នំញញ្ញា ខាងជើងភូមិអូនាងហីង ឃុំតាំងក្រូច ស្រុកសំរោងទង ខេត្តកំពង់ស្ពឺ។

បន្ទាប់ពីបើកការស្រាវជ្រាវស៊ើបអង្កេត កម្លាំងជំនាញបានកំណត់អត្តសញ្ញាណជនសង្ស័យឈ្មោះ ម៉ុម រឿន អាយុ៦៤ឆ្នាំ ជនជាតិខ្មែរ ត្រូវជាជីដូនបង្កើត និងបានសួរនាំទើបស្ត្រីឈ្មោះ ម៉ុម រឿន សារភាពថា ខ្លួនពិតជាបានសម្លាប់ចៅប្រុសពិតប្រាកដមែន ដោយសារខ្លួនគ្មានសមត្ថភាពចិញ្ចឹមបន្ត។

ស្ត្រីជនដៃដល់ត្រូវបានកម្លាំងនាយកដ្ឋាននគរនបាលព្រហ្មទណ្ឌ ប្រគល់ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងតាមនីតិវិធី៕