ឆេះទីតាំងស្តុកប្រេងខ្មៅ នៅបាត់ដំបង ខាតបង់ទឹកប្រាក់ជាង ៦ ពាន់ដុល្លារ

ទីតាំងស្តុកប្រេងខ្មៅដ៏ធំមួយកន្លែងត្រូវបានអគ្គីភ័យឆាបឆេះស្ទើរទាំងស្រុង ក្រោយពីម្ចាស់បានអះអាងថា ទំនងជាឆ្លងចរន្តអគ្គិសនី ទើបបណ្ដាលឱ្យមានផ្កាភ្លើងឆាប់ចេះឡើងបែបនេះ។

ហេតុការណ៍ដែលបង្កឱ្យមានការភ្ញាក់ផ្អើលនេះ បានកើតឡើងនៅថ្ងៃទី៨ ខែមិថុនា ឆ្នាំ២០២៤ វេលាម៉ោងប្រហែល ៥ ល្ងាច ស្ថិតនៅចំនុចឡឥដ្ឋអភិវឌ្ឍន៍​​ ក្នុងក្រុមទី០៤ ភូមិបឹងព្រីង ឃុំព្រៃតូច​ ស្រុកមោងឬស្សី​ ខេត្តបាត់ដំបង​។

បើតាមប្រភពនៅជុំវិញទីតាំងកើតហេតុបាននិយាយថា នៅល្ងាចនោះគឺមានផ្សែងខ្មួលខ្មាញ់ឡើងទៅលើ និងចាប់ផ្ដើមមានអណ្ដើកភ្លើងឆាប់ឆេះឡើងយ៉ាងលឿនបំផុត ទើបមានការភ្ញាក់ផ្អើល ព្រមទាំងបានរាយការណ៍ទៅសមត្ថកិច្ចដើម្បីបញ្ជូនរថយន្តពន្លត់អគ្គីភ័យជួយអន្តរាគមន៍។

ករណីអគ្គិភ័យនេះ បណ្តាលឱ្យឆេះធុងស្តុបប្រេងខ្មៅ​ និងរោងដែកប្រក់ស័ង្កសីមួយខ្នង ទំហំ ៣០ ម៉ែត្រ គុណ ៤០ ម៉ែត្រ របស់ម្ចាស់ឈ្មោះ ទៀ​ ហ៊នី​ ភេទប្រុស​ អាយុ​ ៥១ឆ្នាំ​ ស្នាក់នៅកន្លែងកើតហេតុខាងលើ។

សមត្ថកិច្ចមូលដ្ឋានបានអះអាងថា ក្រោយពីទទួលបានសេចក្តីរាយការណ៍ សមត្ថកិច្ចស្រុកគាស់ក្រឡ និងសមត្ថកិច្ចស្រុកមោងឫស្សី បានបញ្ជូនរថយន្តពន្លត់អគ្គីភ័យមកភ្លាមៗដើម្បីជួយអន្តរាគមន៍។ ក្រោយពីទប់ស្កាត់បានហើយ ពិនិត្យឃើញថាសម្ភារខូចខាតរួមមាន៖ ឆេះរោងដែកប្រក់ស័ង្កសី​ ១ខ្នង ឆេះប្រេងខ្មៅ អស់ ១ធុង។ 

សរុបគិតជាទឹកប្រាក់ អស់ប្រហែល ៦ ០០០ ដុល្លា (ប្រាំមួយពាន់ដុល្លា)។ ដោយមូលហេតុ ឆ្លងចរន្តអគ្គិសនី ករណីនេះពុំមានប៉ះពាល់ដល់អាយុជីវិតមនុស្សឡើយ៕

អត្ថបទ៖ សោ និយមរ័ត្ន