អភិបាលខណ្ឌឬស្សីកែវ៖ ក្រុមប្រឆាំងជ្រុលនិយមមួយក្ដាប់តូចបាននិងកំពុងញុះញង់ឲ្យពលរដ្ឋចូលរួមក្នុងចលនាបដិវត្តន៍ពណ៌

លោក ជិន ប៊ុនធឿន អភិបាលខណ្ឌឫស្សីកែវ បានលលើកឡើងថា ក្រុមប្រឆាំងជ្រុលនិយមមួយក្ដាប់តូចបាននិងកំពុងញុះញង់អោយប្រជាពលរដ្ឋចូលរួមក្នុងចលនាបដិវត្តន៍ពណ៌ ដើម្បីផ្ដួលរំលំរាជរដ្ឋាភិបាលស្របច្បាប់។ ការលើកឡើងរបស់អភិបាលខណ្ឌឬស្សីកែវនេះ ធ្វើឡើងនៅពេលដែលអញ្ជើញចុះជួបសំណេះសំណាល ជាមួយគណៈគ្រប់គ្រងវិហារអុីស្លាមគីឡូម៉ែត្រលេខ៩ និងគណៈនាយក សាលាអុីស្លាមគីឡូម៉ែត្រលេខ៩ ដើម្បីជម្រាបព័ត៌មានពីសភាពការណ៍ទូទៅក្នុងមូលដ្ឋានខណ្ឌ នាព្រឹកថ្ងៃសុក្រ ថ្ងៃទី១៦ ខែសីហា ឆ្នាំ២០២៤។

លោកអភិបាលខណ្ឌបញ្ជាក់ថា ក្រុមប្រឆាំងជ្រុលនិយមទាំងនោះ បាននឹងកំពុងអូសទាញប្រជាពលរដ្ឋតាមរយៈការប្រើប្រាស់នូវវិធីញុះញង់អុជអាល បំផុសបំផុល និងការប្រើឧបាយកលនយោបាយបោកបញ្ឆោតអូសទាញប្រមូលកម្លាំងប្រជាជនស្លូតត្រង់ ឱ្យធ្វើបាតុកម្មបះបោរផ្ដួលរំលំរាជរដ្ឋាភិបាលស្របច្បាប់របស់កម្ពុជា។

តំណាងគណៈគ្រប់គ្រងវិហារអុីស្លាមគីឡូម៉ែត្រលេខ៩ និងគណៈនាយកសាលា បានប្រកាសគាំទ្រយ៉ាងពេញទំហឹង ប្រសាសន៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលពន្យល់បន្ថែមទៅលើកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) កាលពីរសៀលថ្ងៃទី១២ ខែសីហា ឆ្នាំ២០២៤ ដែលបានបញ្ជាក់អោយបានដឹងថា កិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម មិនមែនជាគម្រោងអភិវឌ្ឍន៍រួម ឬចូលហ៊ុនគ្នា និងមិនមែនការបាត់បង់ទឹកដីដូចការចោទប្រកាន់នោះឡើយ ពោលជាតំបន់ខ្មែរ គ្រប់គ្រងដោយខ្មែរ៕

អត្ថបទ៖ សំណាង