ផ្ទុះអាវុធជាច្រើនគ្រាប់ក្នុងប្រតិបត្តិការបង្ក្រាប​ជនបែកថ្នាំ ខណៈសមត្ថកិច្ចម្នាក់ស្លាប់

កម្លាំងសមត្ថកិច្ចជាច្រើននាក់បានឡោមព័ទ្ធជនបែកថ្នាំម្នាក់ និងសម្រេចប្រើសិទ្ធការពារខ្លួនបាញ់បញ្ចប់ជីវិតជនសង្ស័យ បន្ទាប់ពីជនសង្ស័យរូបនេះ ព្យាយាមបាញ់តដៃជាមួយកម្លាំងសមត្ថកិច្ច ក្រោយពីចាក់សម្លាប់មន្ត្រីនគរបាលម្នាក់។

ហេតុការណ៍ដ៏ភ្ញាក់ផ្អើលនេះបានកើតឡើងនៅវេលាម៉ោង៤និង៣០នាទីល្ងាចថ្ងៃទី២៩ ខែសីហា ឆ្នាំ២០២៤ ស្ថិតនៅលើផ្លូវ៣០៤ សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។

តាមព័ត៌មានពីសមត្ថកិច្ចបានឲ្យដឹងថា មុនកើតហេតុជនសង្ស័យបែកខាងលើបានបង្កការអុកឡុកក្នុងផ្ទះ ដោយយកកាំបិតគំរាមចាក់ម្តាយ ទើបក្រុមគ្រួសារទំនាក់ទំនងសុំអន្តរាគមន៍ពីសមត្ថកិច្ច ខណៈសមត្ថកិច្ចដែលជាជនរងគ្រោះមកដល់ចំណុចកើតហេតុក៏ស្រាប់តែជនសង្ស័យបានស្ទុះទៅចាក់លើមន្ត្រីសមត្ថកិច្ចបណ្ដាលរងរបួសធ្ងន់ រួចបានយកកាំភ្លើងពីចង្កេះរបស់សមត្ថកិច្ចដើរស្រែកឡូឡាពេញដងផ្លូវ។ ប្រភពបន្តថា ខណៈសមត្ថកិច្ចចុះអន្តរាគមន៍បន្ថែមក៏ជនសង្ស័យបានបាញ់តដៃ ទើបសមត្ថកិច្ចបានប្រើស្វ័យសិទ្ធិការពារខ្លួនបាញ់បញ្ចប់ជីវិតជនសង្ស័យតែម្ដង។ គិតមកត្រឹមម៉ោង៦និង៣០នាទី ព្រលប់ថ្ងៃដដែលនេះ មន្ត្រីប៉ូលិសដែលត្រូវជនបែកថ្នាំចាក់នោះបានបាត់បង់ជីវិតហើយ។

របាយការណ៍សមត្ថកិច្ចបញ្ជាក់ថា មន្ត្រីប៉ូលិសដែលស្លាប់មានឈ្មោះ សៅ រក្សា អាយុ៣០ឆ្នាំ ឋានន្តរស័ក្តិ អនុសេនីយ៍ត្រី ជាមន្ត្រីបុស្តិ៍នគរបាលបឹងកេងកងទី២ ។ រីឯជនបែកថ្នាំ មានឈ្មោះ ជលា វ័យប្រមាណ៣០ឆ្នាំ ធ្លាប់ចូលមណ្ឌលកែប្រែនិងធ្លាប់ជាប់ពន្ធនាគារផងដែរ។

ដោយឡែកនៅកន្លែងកើតហេតុការណ៍ ប៉ូលិសមូលដ្ឋាន និងជំនាញពាក់ព័ន្ធ បាននិងកំពុងពិនិត្យកោសល្យវិច័យ នៅកន្លែងកើតហេតុដើម្បីបន្តតាមជំនាញ៕

អត្ថបទ៖ សំណាង