រដ្ឋបាលខណ្ឌដូនពេញដាក់ឲ្យអនុវត្តសាកល្បង សេវារដ្ឋបាលតាមប្រពន្ធ័ស្វ័យ​ប្រវត្តិកម្ម Online

ដើម្បីបង្កើនភាពកាន់តែងាយស្រួលដល់ប្រជាពលរដ្ឋមកទទួលសេវាសាធារណៈពីការិយាល័យច្រកចេញចូលតែមួយរដ្ឋបាលខណ្ឌដូនពេញ បានដាក់អោយអនុវត្តសាកល្បង ការស្នើសុំសេវា និងផ្តល់សេវារដ្ឋបាលតាមប្រពន្ធ័ស្វ័យប្រវត្តិកម្ម(Online) បន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការជូនដំណឹងរបស់រដ្ឋបាលខណ្ឌដូនពេញបានឲ្យដឹងកាលពីថ្ងៃទី៩ កញ្ញា ថា ដើម្បីឆ្លើយតបស្របតាមយុគសម័យបច្ចេកវិទ្យាឌីជីថលទំនើប ក្នុងការបម្រើសេវាជូនប្រជាពលរដ្ឋអោយបានប្រសើរឡើង រហ័ស ចំណេញពេលវេលា រដ្ឋបាលខណ្ឌនឹងអនុវត្តសាកល្បងការផ្តល់សេវារដ្ឋបាលតាមប្រព័ន្ធស្វ័យប្រវត្តិកម្ម(Online) ចំនួន០៣វិស័យ រួមមាន ១.ការងារនីត្យានុកូលកម្ម។ ២. ការងារអត្រានុកូលដ្ឋាន។ និង៣. ការងារវិស័យទេសចរណ៍។ ដោយចាប់ផ្តើមទទួលពាក្យស្នើសុំ ចាប់ពីថ្ងៃទី ២៦ ខែកញ្ញា ឆ្នាំ២០២៤ នេះតទៅ តាមរយៈគេហទំព័រ https://onlinedmk.owso.gov.kh ។

រដ្ឋបាលខណ្ឌបញ្ជាក់ថា ក្នុងការអនុវត្តសាកល្បងនេះ ប្រជាពលរដ្ឋអាចដាក់ពាក្យស្នើសុំសេវារដ្ឋបាលតាមប្រព័ន្ធស្វ័យប្រវត្តិកម្ម លើប្រភេទសេវា មានដូចដូចជា ១.ការងារនីត្យានុកូលកម្ម មានចំនួន ០៣ សេវា៖ សៀវភៅស្នាក់នៅ,សៀវភៅគ្រួសា រ និងអត្តសញ្ញាណបណ្ណសញ្ជាតិខ្មែរ។

២. ការងារអត្រានុកូលដ្ឋាន មានចំនួន ០៣ សេវា៖ សេចក្តីចម្លងសំបុត្រ /បញ្ជាក់កំណើត, សេចក្តីចម្លងសំបុត្រអាពាហ៍ពិពាហ៍ និងសេចក្តីសម្លងសំបុត្រមរណៈភាព។

៣. និងវិស័យទេសចរណ៍ មានចំនួន ០៣ សេវា៖ ការស្នើសុំបើកថ្មីផ្ទះសំណាក់ ចាប់ពី ០៨ បន្ទប់ ចុះក្រោម , ការស្នើសុំបន្តសុពលភាពផ្ទះសំណាក់ ចាប់ពី ០៨ បន្ទប់ ចុះក្រោម និង ការស្នើសុំប្តូរម្ចាស់ផ្ទះសំណាក់ ចាប់ពី ០៨ បន្ទប់ ចុះក្រោម។

ទន្ទឹមនឹងការផ្តល់សេវារដ្ឋបាលបន្ថែមតាមប្រព័ន្ធស្វ័យប្រវត្តិកម្ម (Online) នេះ ប្រជាពលរដ្ឋអាចអញ្ជើញមកទំនាក់ទំនងស្នើសុំសេវាដោយផ្ទាល់ នៅការិយាល័យច្រកចេញចូលតែមួយខណ្ឌដូនពេញ និងសូមប្រជាពលរដ្ឋ កុំប្រើប្រាស់ការរត់ការដែលនាំឲ្យខាត់បង់ថវិការ ឬពេលវេលារបស់ប្រជាពលរដ្ឋសូមទៅជួបផ្ទាល់ជាមួយមន្រ្តីនៃការិយាល័យច្រកចេញចូលតែមួយ ដើម្បីទទួលសេវាបានលឿនរហ័សទាន់ពេលវេលា៕

អត្ថបទ៖ សុភា