ព័ត៌មានជាតិ

វេទិការពិគ្រោះយោបល់ បើកឱកាសឲ្យពលរដ្ឋលើកឡើងពីសំណើរសំណូមពរ និង ទុក្ខកង្វល់ជូនអាជ្ញាធរដើម្បីដោះស្រាយ

បានផុស

២ សប្តាហ៍ មុន

នៅ

ថ្ងៃសុក្រ ៣ កក្កដា ២០២៦

ដោយ

វេទិការផ្សព្វផ្សាយនិងពិគ្រោះយោបល់ជាវេទិកា សំខាន់បានបើកឱកាសឲ្យពលរដ្ឋលើកឡើង ពីសំណើរសំណូមពរនិងទុក្ខកង្វល់នានាជូនអាជ្ញាធរ ដើម្បីដោះស្រាយ អោយបានទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី០៣ ខែកក្កដា ឆ្នាំ២០២៦នេះ រដ្ឋបាលខណ្ឌដូនពេញ បានរៀបចំវេទិកាផ្សព្វផ្សាយ និង ពិគ្រោះយោបល់របស់ក្រុមប្រឹក្សាខណ្ឌដូនពេញ អាណត្តិទី៤ ឆ្នាំ២០២៦ ធ្វើឡើងក្រោមអធិបតីភាពលោក សែមសក្តិ សិនា ជំនួយការសម្តេចធិបតីនាយករដ្ឋមន្ត្រីតំណាង លោក ឆៃ ស៊ីណារិទ្ធិ ទេសរដ្ឋមន្ត្រីប្រធានក្រុមការងារ រាជរដ្ឋាភិបាលចុះមូលដ្ឋានខណ្ឌដូនពេញលោក ហែម អាន ប្រធានក្រុមប្រឹក្សាខណ្ឌ និង លោក ជា ខេមា អភិបាលខណ្ឌដូនពេញ រួមទាំងលោកលោកស្រី អភិបាលរង មន្ត្រីពាក់ព័ន្ធក្នុងមូលដ្ឋានរួមទាំង ប្រជាពលរដ្ឋជាច្រើនទៀតផងដែរ។

គណៈគ្រប់គ្រងសាលា និង តំណាងពលរដ្ឋបង្ហាញការយល់ឃើញថា ៖ វេទិកានៅពេលនេះគឺជាភាពស្និទ្ធិស្នាល និងកាន់តែគៀកគិត រវាងរាស្ត្រនិងមន្ត្រីរដ្ឋពិសេសបញ្ហា និង ទុក្ខកង្វល់ដែលចង់បញ្ចេញ ដើម្បីសុំការអន្តរាគមន៍ដោះស្រាយក៏ត្រូវបានយកមកលើក ឡើងនៅក្នុងវេទិកានេះ ដើម្បីមន្ត្រីដោះស្រាយឆ្លើយតបឲ្យបានលឿនរហ័សជូនពួកគាត់។

លោក សែមសក្តិ សិនា ជំនួយការសម្តេចធិបតីនាយករដ្ឋមន្ត្រីតំណាង លោក ឆៃ ស៊ីណារិទ្ធិ ទេសរដ្ឋមន្ត្រីប្រធានក្រុមការងាររាជរដ្ឋាភិបាលចុះមូលដ្ឋានខណ្ឌដូនពេញ បានឡើងមានប្រសាសន៍ដាក់ចេញទិសដៅការងារសំខាន់ៗ មួយចំនួនដែលជាគោលដៅការងារចម្បង របស់ថ្នាក់ជាតិជូនដល់អាជ្ញាធរខណ្ឌ ដើម្បីអនុវត្តក្នុងគោលដៅបម្រើពលរដ្ឋនិងរៀបចំសង្គម ឲ្យបានល្អប្រសើរទៅមុខទៀតក្រោមបរិយាកាសប្រកបដោយសុខដុមនីយកម្ម។

លោក ជា ខេមា អភិបាលខណ្ឌដូនពេញ ក៏បានឡើងមានមតិទទួលយកសំណើរ សំណូមពររបស់ប្រជាពលរដ្ឋដើម្បីយកទៅពិភាក្សាបន្តជាមួយមន្ត្រីជំនាញ ក្រោមឱវាទក្នុងការដោះស្រាយបញ្ហាទាំងនេះ ឲ្យបានលឿនរហ័សកុំឲ្យបន្តប៉ះពាល់ដល់ការរស់នៅប្រចាំថ្ងៃរបស់ពលរដ្ឋ។

បន្ថែមពីការទទួលយកសំណើរសំណូមពរ លោកអភិបាលខណ្ឌក៏ បានជម្រាបជូនអង្គគណៈអធិបតីផងដែរថា៖ ខណ្ឌដូនពេញ ជាខណ្ឌមួយដែលជាបេះដូង នៃ រាជធានីភ្នំពេញ ដែលបច្ចុប្បន្ននេះមានតំបន់កម្សាន្ត និង ទេសចរណ៍ជាច្រើនក្នុងមូលដ្ឋាន ដែលបានទាក់ទាញទេសចរណ៍ជាតិ និង អន្តរជាតិជាច្រើនមកដើរលេងកម្សាន្ត។ ដូច្នោះហើយ ក្នុងនាមអាជ្ញាធរ គឺចាំបាច់បំផុត ត្រូវតែពង្រឹងកិច្ចការងារការពារសន្តិសុខសុវត្ថិភាព និងរបៀបរៀបរយឲ្យបានល្អ ជូនពលរដ្ឋ ភ្ញៀវជាតិ អន្តរជាតិ និងសង្គមជាតិទាំងមូលឲ្យបានល្អបំផុត។

បន្ថែមពីនោះដែរ អាជ្ញាធរខណ្ឌ ក៏បាននឹងកំពុងយកចិត្តទុកដាក់ លើការតាមដានទប់ស្កាត់ និងបង្ក្រាបដាច់ខាតលើបទល្មើសឆបោកតាមប្រព័ន្ធបច្ចេកវិទ្យា Online Scams ស្របតាមគោលជំហរមុតមាំ និងការប្តេជ្ញាខ្ពស់របស់សម្តេចប្រមុខថ្នាក់ដឹកនាំ ក្នុងយុទ្ធនាការបោសសម្អាតបទល្មើសនេះ ឲ្យអស់ចេញពីកម្ពុជា៕ អត្ថបទ ៖ សុភា