អាជ្ញាធរខណ្ឌឬស្សីកែវចុះពិនិត្យសិប្បកម្មផលិតទឹកកកមួយកន្លែងក្រោយមានពាក្យបណ្ដឹងពីពលរដ្ឋ

ទីតាំងសិប្បកម្មផលិតទឹកកកមួយកន្លែងក្នុងខណ្ឌឬស្សីកែវ ត្រូវបានប្រជាពលរដ្ឋនាំគ្នាដាក់ពាក្យបណ្ដឹងទៅកាន់អាជ្ញាធរក្រោយមានការលេចធ្លាយអាម៉ូរញាក់ប៉ះពាល់ដល់សុខភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្មាស់ រិទ្ធី អភិបាលខណ្ឌស្ដីទី កាលពីព្រឹកថ្ងៃទី៩ ខែតុលា បានដឹកនាំក្រុមការងារចុះទៅទីតាំងសិប្បផលិតទឹកកក ស្ថិតក្នុងសង្កាត់​ប្ញស្សីកែវ ដែលមានម្ចាស់ឈ្មោះ តាន់ អេងប៉ោ ក្រោយមានការប្តឹងពីប្រជាពលរដ្ឋជិតខាងលើករណីលេចធ្លាយឧស្ម័នអាម៉ូរញាក់ កាលពីវេលាម៉ោង២រំលងអធ្រាត្រ។

ពេលកម្លាំងអាជ្ញាធរចុះទៅដល់ទីតាំងផលិតទឹកកខាងលើ ម្ចាស់ទីតាំងបានបញ្ជាក់ថា សិប្បកម្មរបស់លោកបានធ្វើការជួសជុលកែលម្អរួចរាល់កាលពីវេលាម៉ោង២និង៣០ នាទីយប់នៅថ្ងៃខែឆ្នាំដដែល។

ដោយឡែកចំពោះគុណភាពទឹកកក យោងទៅតាមច្បាប់គ្រប់គ្រង់សិប្បកម្ម គឺក្នុង៣ខែត្រូវយកសំណាកទៅពិនិត្យម្ដង បើពិនិត្យលទ្ធផលទាំងនោះមិនត្រឹមត្រូវទៅតាមស្តង់ដាទឹកកក សម្រាប់ឲ្យប្រជាពលរដ្ឋទទួលទានទេ មន្ទីរជំនាញនឹងណែនាំឲ្យរោងចក្រទឹកកកដែលផលលិតនេះកែតម្រូវទៅតាមស្តង់ដាទឹកកកល្អ ដែលអាចលក់ជូនប្រជាពលរដ្ឋក្នុងការទទួលទាន ដោយត្រូវគិតពីបញ្ហាសុខភាពជាធំ មិនមែនចេះតែលក់ឲ្យដាច់មិនគិតគួរពីសុខភាពពលរដ្ឋនោះទេ សំខាន់ត្រូវគិតគួរពីសុខភាពពលរដ្ឋ ។

ជាមួយគ្នានេះក្រុមការងារបានណែនាំទៅម្ចាស់រោងចក្រដូចខាងក្រោម:
១.ផ្អាកដំណើរការអាជីវកម្មជាបណ្ដោះអាសន្នរង់ចាំមន្ទីរជំនាញចុះត្រួតពិនិត្យលើលក្ខណៈបច្ចេកទេសរួចរាល់សិនទើបអនុញ្ញាតឲ្យដំណើរការអាជីវកម្មឡើងវិញ។
២.ណែនាំឲ្យម្ចាស់អាជីវកម្មត្រូវមានការប្រុងប្រយ័ត្នឱ្យបានខ្ពស់ជៀសវាងបង្ករលក្ខណៈប៉ះពាល់ដល់ប្រជាពលរដ្ឋរស់នៅជិតខាង៕

អត្ថបទ៖ ម៉េង