នគរបាលព្រហ្មទណ្ឌ​ លំអិតពីសកម្មភាពចាប់បង្ខាំង និងជំរិតទារប្រាក់បង្កដោយឧក្រិដ្ឋជនជនជាតិវៀតណាមនៅក្រុងបាវិត

ចាប់ពីថ្ងៃទី២៩ ខែធ្នូ ឆ្នាំ២០២៤ រហូតដល់ថ្ងៃទី២ ខែមករា ឆ្នាំ២០២៥ កម្លាំងជំនាញនគរបាលព្រហ្មទណ្ឌក្រសួងមហាផ្ទៃ សហការជាមួយកម្លាំងនៃស្នងការដ្ឋាននគរបាលខេត្តស្វាយរៀង បានស្រាវជ្រាវដកហូតវត្ថុតាងមួយចំនួនជាបន្តបន្ទាប់ និងចាប់ខ្លួនក្រុមឧក្រិដ្ឋជនជនជាតិវៀតណាមសរុបចំនួន១២នាក់ ពាក់ព័ន្ធករណីចាប់បង្ខាំង និងជំរិតទារប្រាក់។

តាមរបាយការណ៍របស់នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានឲ្យដឹងនៅថ្ងៃទី២មករា នេះថា កាលពីថ្ងៃទី២៧ ខែធ្នូ ឆ្នាំ២០២៤ ជនសង្ស័យឈ្មោះ ង្វៀង វ៉ាន់ថាំង ភេទប្រុស អាយុ១៩ឆ្នាំ ជនជាតិវៀតណាម បានទៅដកប្រាក់នៅទីតាំងប្តូរប្រាក់មួយកន្លែងក្នុងក្រុងបាវិតចំនួន១ម៉ឺនដុល្លារអាមេរិក។ របាយការណ៍បន្ថែមថា មុនពេលជនសង្ស័យមកដកប្រាក់ គឺជនសង្ស័យ និងបក្ខពួក៣នាក់ទៀត បានចូលទៅកាស៊ីណូយីហោ ហ្គោតឡាក់ ដែលមានទីតាំងទល់មុខកន្លែងដកប្រាក់។ បន្ទាប់ពីដកប្រាក់រួច ជនសង្ស័យទាំង៤នាក់ បានឡើងជិះរថយន្ត១គ្រឿង ម៉ាកLEXUS RX330 ពណ៌ស ពាក់ស្លាកលេខ ភ្នំពេញ 2BJ-8559។​

ដល់ថ្ងៃទី២​ ខែមករា ឆ្នាំ២០២៥ កម្លាំញជំនាញបានស្រាវជ្រាវរកឃើញរថយន្តម៉ាកស្ដារិចពណ៍ស ពាកស្លាកលេខ2BV-8092 ដែលក្រុមជនសង្ស័យ​ចាប់ជនរងគ្រោះ​យកទៅបង្ខាំង​ ជំរិតទារប្រាក់ និងបានដកយករថយន្តនោះនៅចំណុច​កាស៊ីណូថៃថេន​ វេលាម៉ោង៤​និង១០នាទីល្ងាច និងខ្នោះដៃ១គូ ច្រវ៉ាក់២ខ្សែ ស្កុតរុំ២ដុំ ញញួរ១ ស្រោមដៃ១ថង់ ខ្សែរឹតចងមួយចំនួន។

បន្ទាប់ពីបើកការស្រាវជ្រាវ កម្លាំងជំនាញបានអញ្ជើញម្ចាស់រថយន្តឈ្មោះ​​ អាត កន​ យកមកសាកសួរនៅអធិការដ្ឋានក្រុងបារិត​​បានបំភ្លឺថា​​ ខ្លួនបានជួលរថយន្តខាងលើឲ្យទៅឈ្មោះ​ BUIHUY QUYEN ភេទប្រុស​ ជនជាតិវៀតណាម កាន់លិខិតឆ្លងដៃលេខC6837837 កាលពីថ្ងៃទី​១៩​ ខែសីហា​ ឆ្នាំ២០២៤​ ក្នុងតម្លៃ​​ ៦៥០​​ដុល្លារអាមេរិក​ (ប្រាំមួយរយហាសិបដុល្លារអាមេរិក) ក្នុងមួយខែយកទៅប្រើប្រាស់បន្ត។

តាមរយៈកាមេរ៉ាសុវតិ្ថភាពពីកាស៊ីណូ ថៃថេន នៅថ្ងៃទី២៨​ ឈានចូលថ្ងៃទី២៩​ ខែធ្នូ ឆ្នាំ២០២៤​ វេលាម៉ោង​១២និង២៩នាទីរំលងអធ្រាត្រ បានឃើញរថយន្តខាងលើ យកមកចតទុកក្នុងបរិវេនកាស៊ីណូ ហើយអ្នកបើកបររថយន្តនោះ បានដើរចេញហើយគេចខ្លួនបាត់។ ចំពោះរថយន្តស្តារិច និងសម្ភារៈខាងលើបានប្រគល់ទៅឲ្យស្នងការដ្ឋាននគរបាលខេត្តស្វាយរៀង ដើម្បីបន្តនីតិវិធី៕