សន្តិសុខសង្គម

អយ្យការអមសាលាដំបូងខេត្តត្បូងឃ្មុំ នឹងស្រាវជ្រាវលើពាក្យចចាមអារ៉ាម ដោះលែងអ្នកផលិតកាំបិតត្រឡប់ទៅផ្ទះ ជាថ្នូរនឹងប្រាក់ ៥ ៥០០ ដុល្លារ

បានផុស

១ year មុន

នៅ

ថ្ងៃពុធ ១២ កុម្ភៈ ២០២៥

ដោយ

អយ្យការអមសាលាដំបូងខេត្តត្បូងឃ្មុំ នឹងធ្វើការស្រាវជ្រាវបន្ថែមទៅលើពាក្យចចាមអារ៉ាមដែលបានលើកឡើងថា «ដោះលែងអ្នកផលិតកាំបិតឲ្យបានត្រឡប់ទៅផ្ទះវិញ ជាថ្នូរនឹងប្រាក់ចំនួន ៥ ៥០០ ដុល្លារ»។ នេះបើយោងតាមសេចក្ដីប្រកាសព័ត៌មានរបស់អយ្យការអមសាលាដំបូងខេត្តត្បូងឃ្មុំ នៅថ្ងៃទី ១២ ខែកុម្ភៈ ឆ្នាំ ២០២៥ នេះ។

តាមរយៈសេចក្ដីប្រកាសព័ត៌មានខាងលើបានឲ្យដឹងថា កាលពីថ្ងៃទី ០៧ ខែកុម្ភៈ ឆ្នាំ ២០២៥ ថ្មីៗ នេះ អយ្យការអមសាលាដំបូងខេត្តត្បូងឃ្មុំ បានទទួលសំណុំរឿងពីការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តត្បូងឃ្មុំ ដោយ កាលពីថ្ងៃទី ០៦ ខែកុម្ភៈ ឆ្នាំ ២០២៥ កម្លាំងជំនាញ នៃស្នងការដ្ឋាននគរបាល ខេត្តត្បូងឃ្មុំ សហការជាមួយក្រុម HOTLANE SCAM24/7 របស់អគ្គស្នងការដ្ឋាននគរបាលជាតិ និងអធិការដ្ឋាននគរបាលស្រុកតំបែរ បានចុះបង្ក្រាបទីតាំងសិប្បកម្មធ្វើកាំបិត ០១ កន្លែង នៅចំណុចផ្ទះឈ្មោះ សា សូទី ស្ថិតក្នុងភូមិទួលសំបូរ ឃុំត្រពាំងព្រីង ស្រុកតំបែរ ខេត្តត្បូងឃ្មុំ។

ប្រតិបត្តិការចុះបង្ក្រាបទីតាំងសិប្បកម្មធ្វើកាំបិតនេះដែរ សមត្ថកិច្ចបាននាំខ្លួនជនសង្ស័យចំនួន ០២ នាក់ រួមមាន ៖ ០១.ឈ្មោះ សា សូទី ភេទប្រុស អាយុ ៣៨ ឆ្នាំ ជនជាតិខ្មែរ-ឥស្លាម (មេជាង) និង ០២.ឈ្មោះ អិន ប្រុសទូច ភេទប្រុស អាយុ ២៥ ឆ្នាំ ជនជាតិខ្មែរ-ឥស្លាម (កូនជាង) និងជាអ្នកឡាយវីដេអូលក់កាំបិត និងដាវ តាម FACEBOOK និង TIKTOK។ ចំណែកវត្ថុតាងដកហូតបានមួយចំនួនរួមមាន ៖ ដាវវែង ចំនួន ០៣ ដើម , ដាវខ្លី ០៦ ដើម , កាំបិតផ្គាក់ដងវែង ០៣ ដើម , កាំបិតផ្គាក់ដងខ្លី ០១ ដើម , កាំបិតខ្វែវ ០២ ដើម , កាំបិតបុ័ងតោ ០៣ ដើម , កាំបិតស្នៀត ០៧ ដើម , ពូថៅ ០២ ដើម , ស្រោមដាវធ្វើពីឈើ ០៤ , ស្រោមកាំបិតប៉័ងតោធ្វើពីឈើ ០១ , ឧបករណ៍សម្រាប់កែច្នៃកាំបិត ០៥ និង ម៉ូទ័រ ០៥។

ក្រោយពីសាកសួរ តំណាងអយ្យការ បានសម្រេចឲ្យជនសង្ស័យ ០២ នាក់ ខាងលើ វិលត្រឡប់ទៅផ្ទះវិញជាបណ្ដោះអាសន្ន តាមរយៈការស្នើសុំធានាកូនក្តីពីសំណាក់មេធាវី។ ចំពោះសំណុំរឿងនេះ តំណាងអយ្យការកំពុងស៊ើបអង្កេតបន្ត៕

អត្ថបទ និង រូបភាព ៖ ឡេក ចាន់ពេជ្រ