ករណីជនជាតិចិនផ្ទុះអាវុធ នៅអគាររតនៈសម្បត្តិ ខណ្ឌពោធិ៍សែនជ័យ សមត្ថកិច្ចឃាត់បានជនសង្ស័យ២នាក់ អាវុធAK២ដើម

ភ្នំពេញ ៖ នាល្ងាចថ្ងៃទី ១៤ ខែកុម្ភៈ ២០២៥នេះ សមត្ថកិច្ចបានឱ្យដឹងថា នគរបាលជំនាញ បានស្រាវជ្រាវឃាត់ជនសង្ស័យបានចំនួន២នាក់ ហើយក្នុងចំណោមបក្សពួក៣នាក់ និងរកឃើញអាវុធAK47 ចំនួន២ដើម រថយន្តចំនួន២គ្រឿងមកកាន់ស្នងការនគរបាលរាជធានីភ្នំពេញដើម្បសួរនាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានឱ្យដឹងថា ក្រោយបង្ករួចជនសង្ស័យ បានយករថយន្តធ្វើសកម្មភាព រួមនឹងអាវុធ ប្លុងចោលនៅក្បែរកន្លែងកើតហេតុ ក្រោយមកសមត្ថកិច្ចបានធ្វើការស្រាវជ្រាវតាមជំនាញ រហូតឃាត់បានជនសង្ស័យបានចំនួន២នាក់ បន្ទាប់ពីកើតហេតុបានប៉ុន្មានម៉ោង ។

សូមរំលឹកថា នារសៀលថ្ងៃទី១៤ ខែកុម្ភៈ ឆ្នាំ២០២៥ មានករណីជនជាតិចិនមួយក្រុម ប្រដាប់ដោយអាវុធវែង AK បានធ្វើសកម្មភាពបាញ់ចំនួន១គ្រាប់ នៅអគារមជ្ឈមណ្ឌលរតនៈសម្បត្តិ ដែលមានទីតាំងទល់មុខអាកាសយានដ្ឋានអន្ដរជាតិភ្នំពេញ ស្ថិតភូមិក្បាលដំរីកាកាប១ ខណ្ឌពោធិ៍សែនជ័យ រាជធានីភ្នំពេញ ។

តាមរយៈកាមេរ៉ាសុវត្ថិភាព បានបង្ហាញថា ជនជាតិចិនមួយក្រុម ប្រដាប់ដោយអាវុធវែង AK ចំនួន២ដើម ចុះពីលើរថយន្ដមួយគ្រឿង ដើរចូលទៅក្នុងអគារមជ្ឈមណ្ឌលរតនៈសម្បត្តិ សំដៅរកគូជម្លោះ ដោយមិនឃើញក៏បានផ្ទុះអាវុធចំនួន១គ្រាប់ ។

សន្តិសុខនៅកន្លែងកើតហេតុ បានឱ្យដឹងថា ក្រុមជនសង្ស័យខាងលើ សម្រុកចូលមក ដោយកាន់អាវុធវែងចំនួន២ដើម ទំនងរកគូជម្លោះតែរកមិនឃើញ ក៏ខឹងបានបាញ់ចំនួន១គ្រាប់បង្កការភ្ញាក់ផ្អើលតែម្តង ។

ក្នុងហេតុការណ៍នេះ មិនបណ្ដាលឲ្យមានមនុស្សណាម្នាក់រងគ្រោះថ្នាក់នោះទេ ហើយគេក៏មិនទាន់ដឹងថា ផ្ដើមចេញពីមូលហេតុអ្វីនោះដែរ។ បច្ចុប្បន្ន ជនសង្ស័យត្រូវបាននគរបាលជំនាញកំពុងសាកសួរនាំ នៅស្នងការដ្ឋាននគរបាលរាជធានីភ្នំពេញ ៕
ដោយ ៖ សំណាង