លួងលោមចូលផ្ទះសំណាក់មិនបាន ដឹកចូលព្រៃស្ងាត់ចាប់រំលោភបានសម្រេច រួចវាយប្លន់យកទ្រព្យសម្បត្តិអស់

ជនសង្ស័យម្នាក់បានដឹកនារីម្នាក់ចេញពីកន្លែងផឹកស៉ី និងបានលួងលោមចូលទៅដេកផ្ទះសំណាក់ តែនារីរងគ្រោះមិនព្រមក៏ផ្ទុះកំហឹងដឹកយកទៅកន្លែងស្ងាត់ចាប់វាយ និងរំលោភបានសម្រេច រួចប្លន់យកទូរស័ព្ទដៃមួយគ្រឿងគេចខ្លួនបាត់។

ហេតុការណ៍នេះបានកេីតឡេីងកាលពីវេលាម៉ោង៤និង៥៥នាទីព្រឹក ថ្ងៃទី២៣ ខែមេសា ឆ្នាំ២០២៥ នៅភូមិគោកខ្សាច់ សង្កាត់ប្រទះឡាង​ ខណ្ឌកំបូល រាជធានីភ្នំពេញ។

ជនរងគ្រោះមានឈ្មោះ ឌ​ ច រ​ អាយុ២០ឆ្នាំ​ មានទីលំនៅស្រុកសាមគ្គីមានជ័យ​ ខេត្តកំពង់ឆ្នាំង​។ តាមប្រភពព័ត៌មានបានឲ្យដឹងថា​ មុនពេលកេីតហេតុ ជនរងគ្រោះ និងបងស្រី ត្រូវបានសង្សារបងស្រី និងមិត្តភក្ដិម្នាក់ទៀតណាត់ជួបផឹកស៊ីនៅម្តុំផ្លូវចោមចៅ​។ ក្រោយផឹកស៊ីចប់​ បងស្រីជនរងគ្រោះ និងសង្សារ បានដឹកគ្នាតាមម៉ូតូទៅមុនបាត់​ ចំណែកជនរងគ្រោះត្រូវបានជនសង្ស័យដែលត្រូវជាមិត្តភក្តិសង្សារបងស្រីដឹកទៅតាមក្រោយ។

ប្រភពដដែលបានបន្តថា​ ខណៈដឹកតាមផ្លូវជនសង្ស័យបានលួងលោមបបួលជនរងគ្រោះចូលដេកផ្ទះសំណាក់តែជនរងគ្រោះមិនព្រម​ ទេីបធ្វេីឲ្យជនសង្ស័យផ្ទុះកំហឹងដឹកចូលព្រៃស្ងាត់ចាប់វាយទ្រមខ្លួនរួចរំលោភបានសម្រេច និងប្លន់យកទូរស័ព្ទមួយគ្រឿងគេចខ្លួនបាត់។

ក្រោយកេីតហេតុជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ដេីម្បីព្យាបាលចំណែកជនសង្ស័យសមត្ថកិច្ចកំពុងធ្វេីការស្រាវជ្រាវតាមចាប់យកមកដាក់ទោសតាមច្បាប់៕

អត្ថបទ៖ សុខា