បុរសម្នាក់ ងងុយ ក៏បានបើកឡានជ្រុលចង្កូតធ្លាក់ចូលទឹកបឹងកន្សែង នៅខេត្តរតនគិរី

នៅថ្ងៃទី២៧ ខែមេសា ឆ្នាំ២០២៥ មានបុរសម្នាក់ កំពុងបើកបរក៏ងងុយ រួចជ្រុលចង្កូតបើករថយន្តធ្លាក់ចូលទៅក្នុងបឹងកន្សែង ដែលស្ថិតនៅសង្កាត់បឹងកន្សែង ក្រុងបានលុង ខេត្តរតនគិរី វេលាម៉ោង ១៥៖២៥នាទីរសៀល។

បើតាមរបាយការណ៍បឋមរបស់សមត្ថកិច្ច ពីនគរបាលជើងគោកស្នងការនៃស្នងការដ្ឋាន នគរបាលខេត្ត បានឲ្យដឹងថា នៅថ្ងៃរសៀលខាងលើ មានរថយន្តបាឡែនពណ៌ស ម្ចាស់ឡានឈ្មោះ សេង ណាយ ភេទ ប្រុស អាយុ ៣៧ ឆ្នាំ ជនជាតិខ្មែរ តួនាទី មន្ត្រីពន្ធធានាគារ ខេត្តរតនគិរី រួមដំណើរជាមួយកូនអាយុ១០ឆ្នាំ បានធ្វើដំណើរពីជើងទៅត្បូង មកដល់ចំណុចកើតហេតុ ក៏រេចង្កូតធ្លាក់ចូលបឹងកន្សែងតែម្តង។  មូលហេតុពិតប្រាកដមកពីងងុយដេក ទើបកើតឧប្បត្តិហេតុដែលបង្កឡើងដោយខ្លួនឯងនេះ ពុំមានបង្កឲ្យនរណាម្នាក់មានគ្រោះថ្នាក់នោះទេ។ ហេតុការណ៍នេះ ផ្អើលដល់មហាជនចោមរោម មើលយ៉ាងច្រើនកកកុញ ។

បន្ទាប់ពីសមត្ថកិច្ចបានធ្វើអន្តរាគមន៍ស្ទូចរថយន្តពីទឹកបឹងរួចរាល់ ក៏បានប្រគល់រថយន្តខាងទៅឲ្យម្ចាស់ខាងលើវិញហើយ ពីព្រោះពុំបណ្តាឲ្យនរណាម្នាក់រងគ្រោះថ្នាក់នោះទេ៕

អត្ថបទ៖ ខៀវ ចាប