សន្តិសុខសង្គម

ឃាត់ខ្លួនជនបរទេស ១៤ នាក់ ក្នុងប្រតិបត្តិការចុះត្រួតពិនិត្យទីតាំងផ្ទះ ២ កន្លែងផ្សេងគ្នា នៅខណ្ឌចំការមន និងខណ្ឌច្បារអំពៅ

បានផុស

១០ ខែ មុន

នៅ

ថ្ងៃព្រហស្បតិ៍ ១៨ កញ្ញា ២០២៥

ដោយ

កម្លាំងសមត្ថកិច្ចចម្រុះគណៈបញ្ជាការឯកភាពរដ្ឋបាលខណ្ឌចំការមន និង ខណ្ឌច្បារអំពៅ និងសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ ដោយមានការសម្របសម្រួលផ្លូវច្បាប់ពី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យទីតាំងផ្ទះចំនួន ២ កន្លែង ផ្សេងគ្នា (សង្ស័យ Online Scames) ឃាត់ខ្លួនជនបរទេស ១៤ នាក់ កាលពីថ្ងៃទី ១៧ ខែកញ្ញា ឆ្នាំ ២០២៥ ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងចំនួន ២ កន្លែង សង្ស័យ Online Scames រួមមាន ៖ ទីតាំងទី ១-ស្ថិតនៅផ្ទះលេខ C12 ផ្លូវស៊ី(បុរីឧទ្យានបាសាក់) ភូមិ ១០ សង្កាត់ទន្លេបាសាក់ ខណ្ឌចំការមន និង ទីតាំងទី ២-ស្ថិតនៅផ្ទះ ១១៣ ផ្លូវ P25 ភូមិវាលស្បូវ សង្កាត់វាលស្បូវ ខណ្ឌច្បារអំពៅ (ប៉ូលរ៉ូនីស ២) រាជធានីភ្នំពេញ។

នៅក្នុងប្រតិបត្តិការទាំងពីរទីតាំងនោះ សមត្ថកិច្ចបានឃាត់ខ្លួនជនជាតិចិន ១០ នាក់ (ស្ត្រី ១ នាក់) និងជនជាតិវៀតណាម ៤ នាក់ (ស្ត្រី ៣ នាក់) សរុបទាំងពីរទីតាំងនេះ មានចំនួន ១៤ នាក់។ ចំណែកវត្ថុតាងរឹបអូសរួមមាន ម៉ូនីទ័រ ១៣ គ្រឿង , ស៊ីភីយូ ១៧ គ្រឿង , ទូរសព្ទ ៤៦ គ្រឿង , Passport ១៣ , និង laptop ៤ គ្រឿង។ ក្រោយត្រួតពិនិត្យបឋមលើឧបករណ៍អេឡិចត្រូនិក រកឃើញថា បានប្រើប្រាស់ប្រទេសកម្ពុជាធ្វើជាទីតាំងប្រព្រឹត្តបទល្មើស game online។

គួរជម្រាបថា រាជរដ្ឋាភិបាលកម្ពុជា កាលពីថ្ងៃទី ១៤ ខែកក្កដា ឆ្នាំ ២០២៥ បានដាក់ចេញយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានៅទូទាំងប្រទេស ដោយមានការចូលរួមអនុវត្តសកម្មភាពពីក្រសួង ស្ថាប័ន អាជ្ញាធរថ្នាក់ក្រោមជាតិ និងសមត្ថកិច្ចពាក់ព័ន្ធ ដើម្បីបង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ ក្នុងក្របខណ្ឌយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានេះ សមត្ថកិច្ចចម្រុះ នឹងចាត់វិធានការតាមផ្លូវច្បាប់យ៉ាងតឹងរ៉ឹងបំផុតចំពោះមេខ្លោងទាំងឡាយជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ៕

អត្ថបទ ៖ សុខា