កីឡា

ចប់វគ្គសន្សំពិន្ទុក្នុងពូល កម្ពុជា បានឡើងលើ២ប្រទេស ក្នុងតារាងចំណាត់ថ្នាក់ក្លិប AFC

បានផុស

៦ ខែ មុន

នៅ

ថ្ងៃសៅរ៍ ១ វិច្ឆិកា ២០២៥

ដោយ

ចំណាត់ថ្នាក់ក្លិបបាល់ទាត់កម្ពុជា បានហក់ឡើងលើ ឥណ្ឌូណេស៊ី និង ហុងកុង បន្ទាប់ពីក្រុមភ្នំពេញក្រោន និង ព្រះខ័នរាជស្វាយរៀង ធ្វើបានល្អដូចគ្នា នៅវគ្គសន្សំពិន្ទុក្នុងពូល ពានរង្វាន់ AFC Challenge League ដែលទើបបញ្ចប់ទៅនៅថ្ងៃសៅរ៍ ទី១ ខែវិច្ឆិកា ឆ្នាំ ២០២៥។

ការកើនឡើងពិន្ទុនេះតាមរយៈលទ្ធផលការប្រកួតរបស់ក្លិបកម្ពុជា គឺ ព្រះខ័នរាជស្វាយរៀង និង ភ្នំពេញក្រោន ដែលមិនស្គាល់បរាជ័យសោះនៅវគ្គសន្សំពិន្ទុក្នុងពូល។ កាលពីចប់ការប្រកួតសន្សំពិន្ទុជុំទី២ ចំណាត់ថ្នាក់របស់ក្លិបកម្ពុជាបានឡើងលើឥណ្ឌូណេស៊ី ប៉ុន្តែក្រោយចប់ការប្រកួតចុងក្រោយគឺ ឡើងឈរលើហុងកុងតែម្តង។

លទ្ធផល ក្រុមភ្នំពេញក្រោន បានស្មើ Dewa United ដោយលទ្ធផល ១-១, ឈ្នះក្រុម Shan United ៣-១ និងឈ្នះ Tainan City ៣-២។ ចំណែក ព្រះខ័នរាជស្វាយរៀង បានយកឈ្នះ SP Falcons ៣-០, ឈ្នះ Ezra FC ៣-០ និងស្មើក្រុម Manila Digger ១-១ ដើម្បីឈរលើកំពូលតារាងពូល D។

ការប្រកួត ៣ លើករបស់ ភ្នំពេញក្រោន និងការប្រកួត ៣ លើករបស់ ព្រះខ័នរាជស្វាយរៀង សន្សំពិន្ទុបានយ៉ាងច្រើនដើម្បីបានឡើងទៅចំណាត់ថ្នាក់លេខ៩ ដែលចំណាត់ថ្នាក់នេះពីមុនគ្រប់គ្រងដោយ ហុងកុង ដែលបានធ្លាក់ទៅលេខ ១១ ហើយ ឥណ្ឌូណេស៊ី ក៏បានឡើងទៅលេខ១០។

សរុបទៅ ឆ្លងកាត់ការប្រកួតសន្សំពិន្ទុក្នុងពូល កម្ពុជា មាន ២៤.៣៥០ពិន្ទុ បានឡើងឈរលើ ឥណ្ឌូណេស៊ី មាន ២៣.០៤៩ពិន្ទុ និង ហុងកុង មាន ២២.៩៣៣ពិន្ទុ៕