សមាជិកថ្មី សុផល ឌីម៉ង់ កំពុងទទួលបានការទុកចិត្តពីលោកគ្រូ McConkey

ខ្សែការពារចំណូលថ្មីរបស់ ព្រះខ័នរាជស្វាយរៀង កីឡាករ សុផល ឌីម៉ង់ ត្រូវបានគេមើលឃើញ ជាកីឡាករ កំពុងទទួលបានការទុកចិត្តបំផុតម្នាក់ពីសំណាក់គ្រូបង្គោលលោក Matthew McConkey។

ឌីម៉ង់ ត្រូវបានក្លិប ព្រះខ័នរាជស្វាយរៀង ចុះកិច្ចសន្យាយកបានពីក្រុម អង្គរថាយហ្គឺរ នៅរដូវកាលនេះ។ ទោះរូបគេទើបមកចូលរួមជាមួយក្រុមក៏ពិតមែន ប៉ុន្តែខ្សែការពារវ័យ ២៤ ឆ្នាំរូបនេះ បានបង្ហាញសមត្ថភាពល្អគួរឱ្យកត់សម្គាល់ ហើយជានិច្ចជាកាលរូបគេតែងតែស្ថិតនៅក្នុងជម្រើសដំបូងរបស់លោក McConkey។

ចាប់អារម្មណ៍អំឡុងពេលការប្រកួតមិត្តភាពកម្តៅសាច់ដុំមុនបើករដូវកាល ទាំងនៅក្នុងស្រុក និងនៅប្រទេស ម៉ាឡេស៊ី ឃើញថា ឌីម៉ង់ តែងតែត្រូវបានគ្រូបង្វឹកដាក់ឱ្យចូលលេង ទោះពេលខ្លះលេងជម្រើសដំបូងខ្លះ និងពេលខ្លះជាកីឡាករប្តូរចូលក្តី។

ដោយឡែកការប្រកួតផ្លូវការ ២ ប្រកួតចុងក្រោយ សុផល ឌីម៉ង់ ធ្វើបានកាន់តែល្អថែមទៀត ដោយរូបគេសុទ្ធតែបានបង្ហាញខ្លួនពេញ ៩០ នាទី។ ក្នុងការប្រកួតពានបើករដូវកាល Cambodian Super Cup ខ្សែការពារមានដើមកំណើតមកពីខេត្ត សៀមរាបរូបនេះ បានបង្ហាញខ្លួនពេញមួយប្រកួតតែម្តង ហើយនៅទីបំផុតរូបគេបានរួមចំណែកជួយឱ្យ ព្រះខ័នរាជស្វាយរៀង យកឈ្នះលើ ភ្នំពេញក្រោន នៅវគ្គបាល់កាត់សេចក្តី ១១ ម៉ែត្រ ៥-៣ បន្ទាប់ពី ៩០ នាទីស្មើគ្នា ២-២។

ចំណែកការប្រកួតដំបូងក្នុងក្របខណ្ឌលីគកំពូល កម្ពុជា Cambodian Premier League កាលពីថ្ងៃ អាទិត្យ ទី ១០ ខែ សីហា កន្លងទៅថ្មីៗនេះ ឌីម៉ង់ ក៏បានបង្ហាញខ្លួនពេញ ៩០ នាទីផងដែរ។ ក្នុងនោះរូបគេបានរួមចំណែកបិទគូប្រកួតក្រុម ណាហ្គាវើលដ៍ មិនឱ្យស៊ុតបញ្ចូលទីបានសូម្បីមួយគ្រាប់ និងចុងក្រោយជួយឱ្យ ព្រះខ័នរាជស្វាយរៀង ទទួលជ័យជម្នះក្នុងលទ្ធផល ៣-០។

នេះគឺជាការចាប់ផ្តើមរជ្ជកាលថ្មីដ៏ល្អមួយសម្រាប់អាជីពជាកីឡាករបាល់ទាត់របស់ សុផល ឌីម៉ង់ ដែលផ្លាស់មកកាន់ ព្រះខ័នរាជស្វាយរៀង ក្នុងរដូវកាលដំបូង។ អ្វីៗហាក់កំពុងតែដើរនៅលើផែនការរបស់គេ ដោយកាលពីមុនបើករដូវកាលថ្មី រូបគេបានថ្លែងប្រាប់ «កម្ពុជាថ្មី» ថា៖ «រូបគេមកទីនេះ នឹងប្រឹងប្រែងហ្វឹកហាត់ និងបង្ហាញសមត្ថភាពឱ្យបានល្អ ដើម្បីទាក់ទាញចិត្តគ្រូបង្វឹក»៕

អត្ថបទ៖ សេម កុសល