សុផល ឌីម៉ង់ ធ្លាប់ម្តាយហាម​លេងបាល់ ចុងក្រោយប្រឹងជម្នះ​ក្លាយជាកីឡាករអាជីព

ខ្សែបម្រើការពារចំណូលថ្មីរបស់ក្រុមព្រះខ័នរាជស្វាយរៀង កីឡាករ សុផល ឌីម៉ង់ បានទម្លាយពីអតីតកាលរបស់ខ្លួន ដែលធ្លាប់ត្រូវម្តាយហាម​ពី​ការ​លេងបាល់ទាត់ ប៉ុន្តែចុងក្រោយខ្លួនបានជម្នះ​ រហូតក្លាយជាកីឡាករបាល់ទាត់អាជីព។

ថ្លែងប្រាប់សារព័ត៌មាន «កម្ពុជាថ្មី» សុផល ឌីម៉ង់ បាននិយាយថា៖ «ម៉ាក់ខ្ញុំអត់ឱ្យខ្ញុំលេងបាល់ទេ ដោយសារពេលខ្ញុំទៅលេងតាមតារាងស្មៅសិប្បនិម្មិត គឺខ្ញុំយកលុយទៅឱ្យម្ចាស់តារាងរហូត។ ពេលលេងយើងត្រូវចំណាយលុយ ១ ពាន់ ឬ ២ ពាន់រៀល បែបនេះធ្វើឱ្យម្តាយខ្ញុំខឹង ហើយគាត់ប្រាប់ថា អត់ឱ្យលេងទេ ព្រោះយកលុយទៅឱ្យតែគេរហូតអ៊ីចឹង ហើយមិនដែលមានលុយត្រឡប់មកវិញទេ»។

ខ្សែបម្រើការពារមកពីខេត្តសៀមរាប វ័យ ២៤ ឆ្នាំរូបនេះបានបន្តទៀតថា៖ «ពេលយូរៗទៅ ខ្ញុំដាក់ក្តីស្រមៃឱ្យខ្លួនឯង ព្រោះពេលម៉ាក់ខ្ញុំនិយាយអ៊ីចឹង ខ្ញុំអន់ចិត្ត​ខ្លះ​ដែរ។ ខ្ញុំចង់បង្ហាញទៅគាត់ ថា បាល់ទាត់មិនត្រូវតែចំណាយលុយរហូតនោះទេ ត្រូវរកលុយបានវិញដែរ»។

សុផល ឌីម៉ង់ ហាក់ពុំសូវទទួលបានការគាំទ្រពីគ្រួសាររបស់ខ្លួនឡើយ ដោយសារម្តាយរបស់គេ​ហាមឃាត់​ពី​ការ​លេងបាល់​ទាត់​តាំងតែពីក្មេង ពីព្រោះ​ម្តាយគិតថា រូបគេ ពេលទៅលេងម្តងៗ តែងតែយកលុយទៅឱ្យខាងតារាង ហើយមិនដែលបានយកលុយត្រឡប់មកឱ្យគ្រួសារវិញឡើយ។ យ៉ាងណា ដោយសារតែការគិតរបស់ម្តាយបែបនេះ ធ្វើឱ្យ ឌីម៉ង់ ប្រឹងតស៊ូជម្នះ​ រហូតក្លាយជាកីឡាករអាជីព ដោយបានលេងជាមួយក្លិប អង្គរថាយហ្គើរ និងនៅរដូវកាលនេះបានចូលរួមជាមួយក្លិប ព្រះខ័នរាជស្វាយរៀង។

ឌីម៉ង់ បានបន្តថា ក្រោយមក ម្តាយរបស់​ខ្លួន​បានប្រែចិត្ត ដោយគាំទ្រលើក្តីស្រមៃរបស់គាត់វិញ នៅពេលដែលគាត់បានចូលរួមជាមួយក្លិប អង្គរថាយហ្គើរ និងអាចរកបានប្រាក់ខែជូនគ្រួសារ។ ជាទឹកចិត្តម្តាយចំពោះកូន ចុងក្រោយម្តាយរបស់ ឌីម៉ង់ មានតែ​ជំរុញ លើក​ទឹក​ចិត្ត​កូន​ឲ្យ​ប្រឹងប្រែងបន្តទៀតសម្រាប់អាជីពមួយនេះ។

គួរឱ្យដឹងថា សុផល ឌីម៉ង់ បានចាប់ផ្តើមអាជីពជាមួយបាល់ទាត់ដំបូង ដោយចូលរួមជាមួយក្លិបបាល់ទាត់ពាក់កណ្តាលអាជីព គិរីដងរែក។ ក្រោយមក រូប​គេ​​ទទួលបានឱកាស​ចូលរួមជាមួយ អង្គរថាយហ្គើរ នៅឆ្នាំ ២០២០។ បន្ទាប់ពីលេងនៅទីនោះបាន ៥ ឆ្នាំ ដោយនៅឆ្នាំ ២០២៥ នេះរូបគេទទួលបានឱកាសធំ ដោយបានផ្លាស់មកកាន់ក្លិបព្រះខ័នរាជស្វាយរៀង ដែលជាក្លិបការពារតំណែងជើងឯកលីគកំពូល កម្ពុជា Cambodian Premier League៕

អត្ថបទ៖ សេម កុសល