សុផល ឌីម៉ង់ បាន​សម្រេច​បំណង​ជាប់​ជម្រើស​ជាតិ ក្រោយចូលរួម​ជា​មួយ ព្រះខ័ន​រាជ​ស្វាយរៀង

ខ្សែបម្រើការពារ សុផល ឌីម៉ង់ ទទួលបានការកោះហៅចូសជម្រើស កម្ពុជា ក្រុមធំជាលើកដំបូង បន្ទាប់ពីបង្ហាញសមត្ថភាពលេចធ្លោជាមួយក្រុម ព្រះខ័នរាជស្វាយរៀង នា​រដូវ​កាល​នេះ។

សុផល ឌីម៉ង់ ជាកីឡាករវ័យក្មេង ដែលមានសក្តានុពលខ្លាំង ប៉ុន្តែអំឡុងពេលលេងនៅក្លិប អង្គរថាយហ្គើរ។ កីឡាករ មិន​ធ្លាប់​ទទួលបានឱកាសជាប់ជម្រើសជាតិក្រុមធំឡើយ ពោលគឺរូបគេបានជាប់ត្រឹមក្រុមយុវជនប៉ុណ្ណោះ។

យ៉ាងណា ការផ្លាស់មកកាន់ ព្រះខ័នរាជស្វាយរៀង នៅរដូវកាល ២០២៥-២០២៦ សុផល ឌីម៉ង់ បានខិតខំប្រឹងប្រែងយ៉ាងខ្លាំង ហើយជាលទ្ធផល គឺរូបគេតែងតែស្ថិតនៅក្នុងជម្រើស ១១ នាក់ដំបូងរបស់ក្រុមសឹងតែគ្រប់ការប្រកួត ហើយឥឡូវនេះកីឡាករថែមទាំងទទួលបានការទុកចិត្តពីគ្រូបង្វឹកលោក Koji Gyotoku កោះហៅចូលក្រុមធំជម្រើសជាតិ កម្ពុជា ជាលើកដំបូងទៀតផង។

រម្លឹកកាលពីពេលចូលរួមជាមួយ ព្រះខ័នរាជស្វាយរៀង នៅដើមរដូវកាល កីឡាករវ័យ ២៤ ឆ្នាំបានប្រាប់សារព័ត៌មាន «កម្ពុជាថ្មី» ថា៖ «ខ្ញុំនឹងប្រឹងប្រែងហ្វឹកហាត់ឱ្យខ្លាំង និងជួយក្រុមតាមលទ្ធភាព ដែលអាចធ្វើទៅបាន។ ព្រោះមកទីនេះខ្ញុំបានដាក់គោលដៅលើស ១០០% ដើម្បីជួយក្រុម។ គោលដៅដំបូងរបស់ខ្ញុំ ដែលមកព្រះខ័នរាជស្វាយរៀង គឺការបានលេងជម្រើស ១១ នាក់ដំបូង បង្ហាញសមត្ថភាពនៅលើទីលាន ជួយក្លិបឱ្យលើកពាន និងការទទួលបានឱកាសជាប់ជម្រើសជាតិ»។

គួរបញ្ជាក់ ថា កីឡាករទាំង ២៣ នាក់ ដែលសហព័ន្ធបាល់ទាត់ កម្ពុជា ប្រកាសនៅថ្ងៃទី ១០ ខែ វិច្ឆិកា ឆ្នាំ ២០២៥ នេះ នឹងត្រូវមានភារកិច្ចប្រកួតមិត្តភាពទល់នឹងក្រុមជម្រើសជាតិ ហុងកុង នៅទឹកដី ហុងកុង ថ្ងៃ ទី ១៣ ខែ វិច្ឆិកា ឆ្នាំ ២០២៥៕

អត្ថបទ៖ សេម កុសល