កម្ពុជា ដក​ខ្លួន​ពី​ការ​ប្រកួតកីឡា​​ស៊ីហ្គេម នៅ​ថៃ​ជា​លើក​ទី២ ក្រោយ​លើក​ទី​១​ឆ្នាំ ១៩៥៩

ការ​ដក​ខ្លួន​របស់​កម្ពុជា​ចេញ​ពី​ការ​ប្រកួត​កីឡា​ស៊ីហ្គេម លើក​ទី​៣៣ ឆ្នាំ ២០២៥ នៅ​ប្រទេស​ថៃ គឺ​ជា​ការ​ដក​ខ្លួន​​ជា​លើក​ទី​២ ពី​ព្រឹត្តិការណ៍​កីឡា​ស៊ាន​​នៅ​ប្រទេស​ថៃ​ដដែល និង​ក្រោម​ហេតុផល​សុវត្ថិភាព​របស់​ប្រតិភូ​កីឡា​កម្ពុជា​ដដែល។​

លោក​ទេសរដ្ឋ​មន្ត្រី​ ថោង ខុន ប្រធាន​​គណៈកម្មាធិការជាតិអូឡាំពិកកម្ពុជា (NOCC) បាន​រម្លឹក​ថា រាជរដ្ឋាភិបាលកម្ពុជា​ធ្លាប់បានធ្វើពហិការ​ពី​ការ​ចូលរួម​ប្រកួតកីឡាឧបទ្វីបអាស៊ីអាគ្នេយ៍ ( SEAP Games ​ដែល​បច្ចុប្បន្នប្តូរមកជា SEA Games វិញ) លើកទី១ ឆ្នាំ១៩៥៩ នៅក្រុងបាងកក ប្រទេសថៃ​ ក្រោមមូលហេតុ​ពី​ការព្រួយបារម្ម​សុវត្ថិភាពរបស់ ប្រតិភូកីឡាកម្ពុជា​ដែល​ពេល​នោះ​​មាន​បញ្ហាជម្លោះព្រំដែនរវាងកម្ពុជា-ថៃ លើការទាមទារប្រាសាទព្រះវិហារ។

នៅ​ឆ្នាំ ២០២៥ កម្ពុជា បាន​សម្រេច​ដក​​​ខ្លួន​​ចេញពី ព្រឹត្តិការណ៍កីឡាស៊ីហ្គេម លើកទី៣៣ នៅ​ប្រទេសថៃ ទៀត ដោយសារ​បារម្ភ​ពី​​សុវត្ថិភាព​របស់​ប្រតិភូ និង​អត្តពលិក ខណៈ​ជម្លោះ​ព្រំ​ដែន​កំពុង​មាន​សង្គ្រាម​កាន់​តែ​អាក្រក់។

លោក ថោង ខុន បាន​បញ្ជាក់​ថា ការ​ដក​ខ្លួន​របស់​កម្ពុជាមិន​ខុស​នឹង​ច្បាប់ និង​គោល​ការណ៍​កីឡា​អាស៊ាន កីឡា​អូឡាំពិក​អាស៊ី ឬ​អូឡាំពិក​អន្តរជាតិ​ឡើយគឺ គឺស្រប​តាម​គោលនយោបាយ ការការពារអត្តពលិករបស់ គណៈកម្មាធិការអូឡាំពិកអន្តរជាតិ (IOC Athlete Safeguarding Policy) ដែលធានាការពារសុវត្ថិភាព អត្តពលិក ទាំងផ្នែករាងកាយ អារម្មណ៍ និងផ្លូវចិត្តក្នុងការចូលរួមព្រឹត្តិការណ៍កីឡាអន្តរជាតិ ។

គណៈកម្មាធិការជាតិអូឡាំពិកកម្ពុជា គឺជាសមាជិកមួយនៃ ក្រុមប្រឹក្សា​សហព័ន្ធកីឡាអាស៊ីអាគ្នេយ៍ ក្នុងចំណោមសមាជិក​ទាំង​ ១១ ប្រទេស។ គណៈកម្មាធិការជាតិអូឡាំពិកកម្ពុជា ធ្វើសកម្មភាពដើម្បីចលនាអូឡាំពិក ដោយមានកិច្ចសហការ ជាមួយសហព័ន្ធកីឡាជាតិ និង ក្រសួងអប់រំ យុវជន និង កីឡា ប៉ុន្តែ​ត្រូវស្ថិតក្រោម​គោល​នយោបាយដឹកនាំរបស់រាជរដ្ឋាភិបាល  ពី NOCC ជាគណៈកម្មាធិការមួយរបស់ជាតិ។

កីឡា​ស៊ីហ្គេមជាបុព្វសិទ្ធ​របស់ ក្រុមប្រឹក្សាកីឡាអាស៊ីអាគ្នេយ៍  មិនមែនជាបុព្វសិទ្ធរបស់ម្ចាស់ផ្ទះ​នោះទេ ប៉ុន្តែក្រុមប្រឹក្សាកីឡាអាស៊ីអាគ្នេយ៍ ត្រូវសហការសុំ​ការគាំទ្រពីម្ចាស់ផ្ទះក្នុងពិធីបើក-បិទ បដិសណ្ឋារកិច្ច ស្នាក់នៅ ហូបចុក ដឹកជញ្ជូន សន្តិសុខសុវត្ថិភាពជូនដល់ ប្រតិភូ និង អត្តពលិក ដោយភាពស្មើៗគ្នាមិនរើសអើងប្រទេសតូច ឬ ធំ ឬ ជាតិសាសន៍នោះឡើយ។ 

រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ ប្រកបដោយ គតិបណ្ឌិតរបស់ សម្តេចតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភាបច្ចុប្បន្ន បានបំពេញតួនាទី និងភារកិច្ចដ៏ល្អប្រពៃណាស់ ក្នុងការគាំទ្រដល់ ក្រុមប្រឹក្សាកីឡាអាស៊ីអាគ្នេយ៍ និងចលនាកីឡាអូឡាំពិក ក្នុងនាមជាម្ចាស់ផ្ទះ និងក្នុងនាមជាសមាជិកអាស៊ាន ក្នុងការរៀបចំ កីឡាស៊ីហ្គេម លើកទី ៣២  និងអាស៊ាន ប៉ារ៉ាហ្គេម ឆ្នាំ២០២៣។

ការទៅចូលរួមក្នុងព្រឹត្តិការណ៍ស៊ីហ្គេម លើក​ទី​៣៣ ទោះបីក្នុងចំនួនតិច ប៉ុន្តែ​​បាន​បំពេញកាតព្វកិច្ចក្នុងនាមជាសមាជិកក្រុមប្រឹក្សាកីឡាអាស៊ីអាគ្នេយ៍រួចទៅហើយ។ ពិសេសការរួមប្រជុំក្រុមប្រឹក្សាកីឡាអាស៊ីអាគ្នេយ៍ និងការចូលរួមក្នុងពិធី បង្ហូតទង់ជាតិរបស់ប្រទេសជាសមាជិក ហើយក៏បានចូលរួមក្នុងពីធីបើកព្រឹត្តិការណ៍នេះហើយដែរ។ ដូច្នេះក្រុមប្រឹក្សាកីឡាអាស៊ីអាគ្នេយ៍ក្តី ក្រុមប្រឹក្សាអូឡាំពិកអាស៊ី (OCA)  គណៈកម្មាធិការអូឡាំពិកអន្តរជាតិ (IOC) និងស្ថាប័នកីឡា​អូឡាំពិក​​ដទៃទៀតក្តី ក៏មិនអាចរិះគន់ ឬចោទប្រកាន់លើការសម្រេចចិត្ត​ក្នុង​ការដក​ប្រតិភូ និង អត្តពលិក មកវិញរបស់កម្ពុជានោះទេ ព្រោះកាតព្វកិច្ចយើងបានបំពេញរួចរាល់៕

អត្ថបទ៖ វីរបុត្រ