កីឡា

លោក Pep Munoz ទម្លាយឲ្យដឹងពីការធ្វើដំណើរមកប្រទេសឥណ្ឌូណេស៊ី ខែក្រោយ

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

លោក Pep Munoz អតីតគ្រូបង្វឹករបស់ ព្រះខ័នរាជស្វាយរៀង នឹងធ្វើដំណើរមកកាន់ប្រទេសឥណ្ឌូណេស៊ី នាចុងខែកុម្ភៈ ឆ្នាំ ២០២៦ ប៉ុន្តែក៏ប្រហែលជាបន្តដំណើរទៅកាន់ប្រទេសផ្សេងទៀតនៅក្នុងតំបន់អាស៊ាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសារព័ត៌មាន«កម្ពុជាថ្មី»សាកសួរពីចំណាប់អារម្មណ៍ជុំវិញការប្រកួតរវាង ភ្នំពេញក្រោន និង ព្រះខ័នរាជស្វាយរៀង ដែលបានប្រកួតគ្នាកាលពីថ្ងៃអាទិត្យ ទី១៨ ខែមករា ឆ្នាំ ២០២៦ ក្នុងលីគកំពូលកម្ពុជា និងបន្តជួបគ្នា ២ លើកទៀតក្នុងពានរង្វាន់អន្តរជាតិ AFC Challenge League លោក Pep Munoz បានលើកឡើងថា ៖«អំពីការប៉ះគ្នាក្នុងពាន AFC ខ្ញុំអាចនិយាយបានថា ក្រុមទាំងពីរនឹងក្លាយជាការប្រកួតដ៏ពិសេសសម្រាប់វិស័យកីឡាបាល់ទាត់កម្ពុជា»។

«នេះជាផ្នែកវិជ្ជមានមួយដែលនឹងមានក្រុមរបស់កម្ពុជាមួយបន្តដំណើរទៅវគ្គបន្ទាប់។ វានៅរយៈពេលប្រហែលជា២ខែទៀតដែលត្រូវជួបគ្នា ហើយពេលវេលាទាំងនេះគឺពិតជាសំខាន់សម្រាប់ក្រុមទាំងពីរដែលត្រៀមខ្លួនឲ្យបានល្អទាំងផ្នែកបច្ចេកទេស និងស្ថានភាពកីឡាករ»។ លោក Pep Munoz បានបន្ត។

អតីតគ្រូបង្វឹកព្រះខ័នរាជស្វាយរៀងរូបនេះបានបន្ថែមថា ៖«ខ្ញុំមានការងារផ្ទាល់ខ្លួន នឹងធ្វើដំណើរទៅប្រទេសឥណ្ឌូណេស៊ីនាចុងខែកុម្ភៈខាងមុខនេះ»។

ទោះបីជាយ៉ាងណា បុរសសញ្ជាតិអេស្ប៉ាញរូបនេះមិនបានឲ្យដឹងពីកិច្ចការផ្ទាល់ខ្លួនអ្វីទេដែលលោកមាននៅប្រទេសឥណ្ឌូណេស៊ី ប៉ុន្តែលោកអាចនឹងបន្តដំណើរទៅប្រទេសណាផ្សេងទៀតនៅក្នុងតំបន់អាស៊ាន។

កាលពីខែធ្នូ ឆ្នាំ ២០២៥ កន្លងទៅ លោក Pep Munoz បានប្រាប់សារព័ត៌មានអន្តរជាតិក្នុងបទសម្ភាសមួយដោយបានក្លិបព្រះខ័នរាជស្វាយរៀងមានរចនាសម្ព័ន្ធដឹកនាំ ផែនការ និងគោលដៅច្បាស់លាស់។ ជាកន្លែងដែលលោកធ្វើការងារជាគ្រូបង្គោលដោយសេរីភាព និងទទួលបានការគាំទ្រពីក្រុមការងារ។ មិនត្រឹមតែប៉ុណ្ណោះក្នុងរយៈពេល ២ ឆ្នាំនៅកម្ពុជា លោកបានរៀនសូត្រច្រើនពីជីវិតរស់នៅ ហើយជាពិសេសប្រជាជនផ្តល់ភាពកក់ក្តៅដល់ជនបរទេស។

សូមបញ្ជាក់ថា លោក Pep Muñoz បានដឹកនាំ ក្លិបព្រះខ័នរាជស្វាយរៀង ពីររដូវកាលដោយបានឈ្នះជើងឯកលីគកំពូលកម្ពុជា ២ ឈ្នះជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ១ និងជើងឯករង AFC Challenge League។ លោកបានចាកចេញពីកម្ពុជានៅចុងបញ្ចប់រដូវកាល ២០២៤-២៥ ទៅដឹកនាំក្លិបនៅចិន ហើយបានចាកចេញពីចិននៅពាក់កណ្តាលរដូវកាល ២០២៥-២៦ ទៅស្រុកកំណើតនៅប្រទេសអេស្ប៉ាញវិញ៕