កីឡា

សហព័ន្ធបាល់ទះកម្ពុជា ប្រារព្ធពិធីបើកការប្រកួតពានរង្វាន់សម្ដេច ក្រឡាហោម លើកទី៤ ជាផ្លូវការ

បានផុស

៣ ខែ មុន

នៅ

ថ្ងៃអាទិត្យ ៨ កុម្ភៈ ២០២៦

ដោយ

សហព័ន្ធកីឡាបាល់ទះកម្ពុជា បានធ្វើពិធីបើកការប្រកួតពានរង្វាន់សម្ដេច ក្រឡាហោម លើកទី៤ ឆ្នាំ២០២៦ ជាផ្លូវការហើយកាលពីល្ងាចថ្ងៃទី៧ ខែកុម្ភៈ ខណៈថ្ងៃបើកឆាកដំបូងនេះមាន ៦ក្រុមស៊ីគ្នាស្ទើរ ៣-០ សឹងទាំងអស់តែម្ដង។

ទិដ្ឋភាពបើកការប្រកួត

មុនឈានដល់ពិធីបើកការប្រកួតពានរង្វាន់សម្ដេច ក្រឡាហោម គឺមាន ៣ក្រុមធ្វើការប្រកួតតាំងពីម៉ោង ៨ព្រឹកថ្ងៃទី៧ ខែកុម្ភៈ ឆ្នាំ២០២៦ នេះមកម្ល៉េះ ស្របពេលរសៀលក៏មានការប្រកួតចំនួន ៣គូទៀតផងដែររហូតដល់គណៈអធិបតីអញ្ចើញដល់ និងប្រារព្ធពិធីតែម្ដង។

ក្នុងថ្ងៃបើកឆាកដំបូងនេះដែរលោក ប្រាក់ សារ៉ាន់ឌី គ្រូជំនួយក្លឹបបាល់ទះស្នងការដ្ឋាននគរបាលរាជធានីភ្នំពេញ លើកឡើងថា កូនក្រុមរបស់លោកប្រកួតបានល្អ ប៉ុន្តែក៏មានការខ្វះខាតបន្តិចបន្តួចដែរដោយសារកម្ពៅសាច់ដុំមិនទាន់បានគ្រប់គ្រាន់សម្រាប់កីឡាករ។

ទិដ្ឋភាពបើកការប្រកួត

ចំណុចល្អដែរស្នងការរាជធានីភ្នំពេញ ធ្វើបាននោះគឺចាប់សេវាដៃគូបានល្អ និងមិនសូវវាយខូចសេវានោះទេ។ ចំណែកខាងបញ្ជាការរដ្ឋានអង្គរក្ស B ការម៉ាត់ផ្ដាច់ប្រហាក់ប្រហែលក្រុមរបស់លោកដែរ ប៉ុន្តែមើលឃើញថាស្ទើរការធ្វើរនាំងបន្តិច។ មុនការប្រកួតលោកគិតថារវាងស្នងការរាជធានីភ្នំពេញ និងបញ្ជាការរដ្ឋានអង្គរក្ស B នេះអាចនឹងឈានដល់ទៅ ៤ ឬ ៥ សិតទើបដឹងចាញ់ឈ្នះតែជាក់ស្ដែងផ្ទុយទៅហ្នឹងការគិតទៅវិញ។

ទិដ្ឋភាពបើកការប្រកួត

បញ្ជាក់ដែរថា ការប្រកួតពានរង្វាន់សម្ដេច ក្រឡាហោម លើកទី៤ នេះចាប់ផ្ដើមឡើងពីថ្ងៃទី៧ ខែកុម្ភៈ ដល់ថ្ងៃទី១ ខែមីនា ឆ្នាំ២០២៦ នៅពហុកីឡដ្ឋានជាតិ។ ដោយឡែកលទ្ធផល ៦គូនៃថ្ងៃបើកឆាកដំបូងនេះរួមមាន៖

ស្នងការ ន.ប ខេត្តព្រៃវែង ៣-០ ស្នងការ ន.ប ខេត្តប៉ៃលិន

ស្នងការ ន.ប ខេត្តបន្ទាយមានជ័យ ០-៣ លោកតាឌីខេត្តព្រះវិហារ

អាចារ្យលាក់ខេត្តកំពង់ធំ ២-៣ ស្នងការ ន.ប ខេត្តព្រះសីហនុ

ស្នងការ ន.ប ខេត្តត្បូងឃ្មុំ ៣-០ ស្នងការ ន.ប ខេត្តបាត់ដំបង

កងពលធំអន្តរាគមន៍លេខ៣ ៣-០ ស្នងការ ន.ប ខេត្តកំពង់ចាម

ស្នងការ ន.ប រាជធានីភ្នំពេញ ៣-០ បញ្ជាការដ្ឋានអង្គរក្ស B ៕