កីឡា

លោក សាន សុក្រិត៖ តាមសាលាឯកជន សន្ទុះនៃការស្រឡាញ់ និងហ្វឹកហាត់កីឡាបាល់ទះច្រើន

បានផុស

៣ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

លោក សាន សុក្រិត គ្រូបង្វឹកបាល់ទះជើងចាស់មួយរូបថាឥលូវនេះនៅតាមវិស័យសាលាឯកជនមានសន្ទុះ នៃការស្រឡាញ់គាំទ្រ និងហ្វឹកហាត់បាល់ទះមានចំនួនច្រើន ស្របពេលអាណាព្យាបាលយល់ច្បាស់ពីសារសំខាន់នៃការហ្វឹកហាត់កីឡា។

រូបភាពលើផេក Casotr Sports

លោក សាន សុក្រិត បានឲ្យដឹងថា បច្ចុប្បន្ននេះលោកបង្ហាត់បាល់ទះនៅឯសាលាឯកជនឈ្មោះ Castor Sports Academy គឺមានកុមារ យុវជន កំពុងហ្វឹកហាត់ច្រើនក្នុងមួយពេលៗ។ ការហ្វឹកហាត់កីឡានេះគឺមានសារសំខាន់ខ្លាំងដល់សុខភាព និងផ្ដល់គុណសម្បត្តិច្រើនដល់យុជនទើបមានសន្ទុះនៃការគាំទ្រច្រើនបែបនេះ។

រូបភាពលើផេក Casotr Sports

តាមអ្វីដែលលោកយល់ឃើញគឺអាណាព្យាបាលបានដឹងពីសារប្រយោជន៍នៃការហ្វឹកហាត់កីឡាដូចជាជួយដល់កូនៗឲ្យមានសុខភាពល្អ រាងកាយមាំមួន មានភាពរហ័សរហួន និងបង្កើនការទំនាក់ទំនងក្នុងសង្គមជាដើម។ មួយវិញទៀតនោះការហ្វឹកហាត់កីឡាបានជួយឲ្យក្មេងៗមិនយកពេលទំនេរទៅធ្វើអ្វីដែលឥតប្រយោជន៍ លេងទូរសព្ធជាដើមដោយផ្លាស់មករវល់ជាមួយការហ្វឹកហាត់បាល់ទះ បាល់បោះ ទៅវិញ។

គ្រូបង្វឹកជើងចាស់រូបនេះបន្ថែមទៀតថា ការយល់ឃើញរបស់អាណាព្យាបាលដូចរៀបរាប់ខាងលើនេះហើយទើបបច្ចុប្បន្ននេះសន្ទុះនៃការគាំទ្របាល់ទះ និងការលេងកីឡាមានអ្នកហ្វឹកហាត់ច្រើនដែលខុសពីជំនាន់លោកទាល់តែអ្នកស្រឡាញ់កីឡាខ្លាំងទើបចូលហ្វឹកហាត់ និងតស៊ូទៅបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន សុក្រិត

បញ្ជាក់ដែរថា លោក សាន សុក្រិត ជាអតីតគ្រូបង្វឹកបាល់ទះអាជីពដែលធ្លាប់មានបទពិសោធបង្ហាត់បង្រៀននៅតាមបណ្ដាក្លឹបធំៗ និងក្រុមជម្រើសជាតិទៀតផង។ បច្ចុប្បន្ននេះលោកនៅមិនត្រឹមតែបង្ហាត់បាល់ទះដល់សិស្សនោះទេថែមទាំងចូលរួមការប្រកួតជំរុញលើកទឹកចិត្តយុវជនផង។ ងាកមកវិស័យឯកជនវិញនៅតាមបណ្ដាសាលាអន្តរជាតិផ្សេងៗគឺមានដាក់បញ្ចូលកីឡាជាច្រើនប្រភេទ និងទទួលបានការគាំទ្រហ្វឹកហាត់បែបសុខភាពច្រើនរហូតមានធនធានអាចចូលរួមក្នុងការប្រកួតនានាផងដែរដូចជាពានរង្វាន់សម្ដេច ក្រឡាហោម លើកទី៤ នេះមានសិស្សនិស្សិតមកចូលរួមក៏ច្រើនផងដែរ៕