កីឡា

វិសាខា និង កំពង់ដេវ៉ា ប្រជែង Top 6 ម៉ោងដំណាលគ្នាថ្ងៃសៅរ៍នេះ

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

ក្លិបបាល់ទាត់ វិសាខា និង អឹមអូអាយ កំពង់ដេវ៉ា ត្រូវបានរៀបចំឲ្យប្រកួតចំម៉ោងដំណាលគ្នាដើម្បីប្រជែងកៅអីលំដាប់កំពូលទាំង ៦ (Top 6) សម្រាប់ការប្រកួតចុងក្រោយ ជុំទី២ នៃលីគបាល់ទាត់កំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមកាលវិភាគកំណត់សម្រាប់ការប្រកួតសប្តាហ៍ចុងក្រោយ វិសាខា ប៉ះ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី២១ ខែកុម្ភៈ ហើយក្រុម អឹមអូអាយ កំពង់ដេវ៉ា ត្រូវប៉ះ អាយអេសអាយ ដង្កោសែនជ័យ នៅថ្ងៃអាទិត្យ ទី២២ ខែកុម្ភៈ ប៉ុន្តែគណៈកម្មការរៀបចំការប្រកួតបានសម្រេចរៀបចំពេលវេលាប្រកួតដំណាលគ្នាគឺនៅថ្ងៃសៅរ៍ ទី២១ ខែកុម្ភៈ។

វិសាខា មាន ២៩ ពិន្ទុ ស្ថិតនៅលេខ ៦ ក្នុងតារាងពិន្ទុ បន្ទាប់ពីឈ្នះ ៧ ប្រកួត ស្មើ ៨ ប្រកួត និងចាញ់ ៤ ប្រកួត។ ការប្រកួតសប្តាហ៍ចុងក្រោយ ពួកគេត្រូវធ្វើការធ្ងន់មែនទែនដោយត្រូវជួបក្រុមលេខ ២ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី២១ ខែកុម្ភៈ ឆ្នាំ ២០២៦ នៅកីឡដ្ឋានភ្នំពេញក្រោន។

ពួកគេត្រូវការឈ្នះដាច់ខាត ដើម្បីស្ថិតនៅវគ្គ Top 6 ដោយស្វ័យប្រវត្តិ។ ប្រសិនបើស្មើ ឬ ចាញ់នោះ ពួកគេប្រឈមនឹងហានិភ័យខ្ពស់។ ទោះបីជាយ៉ាងណា វាពិបាកខ្លាំងសម្រាប់ វិសាខា ពីព្រោះ ភ្នំពេញក្រោន ទើបតែចាញ់ អង្គរថាយហ្គឺរ ៣-៤ ដូច្នេះពួកគេត្រូវការពិន្ទុដើម្បីប្រជែងជើងឯក។

ចំណែក ក្រុមអឹមអូអាយ កំពង់ដេវ៉ា វិញ ប្រសិនបើ វិសាខា ឈ្នះ ភ្នំពេញក្រោន នោះ កំពង់ដេវ៉ា អស់ឱកាសវគ្គ Top 6 ប៉ុន្តែប្រសិនបើ វិសាខា ចាញ់ ភ្នំពេញក្រោន គឺជាឱកាសមាសសម្រាប់ កំពង់ដេវ៉ា។ ក្រុម កំពង់ដេវ៉ា មាន ២៧ ពិន្ទុ តាមពីក្រោយ វិសាខា តែ ២ ពិន្ទុប៉ុណ្ណោះ បន្ទាប់ពីឈ្នះ ៧ ស្មើ ៦ និងចាញ់ ៦ ស្ថិតនៅលេខ ៧ ក្នុងតារាង។

សូមបញ្ជាក់ថា ក្រុមស្ថិតនៅ Top 6 ដោយជោគជ័យគឺ ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្គាវើលដ៍ និង បឹងកេត។ នៅជុំទី៣ ក្រុមទាំង ៦ ត្រូវធ្វើការប្រកួតពីរជើងទៀតគឺក្នុងដី និងក្រៅដី សរុបចំនួន ១០ ប្រកួតម្នាក់ទៀតទើបចប់លីគកំពូលកម្ពុជារដូវកាល ២០២៥-២៦៕

អត្ថបទ៖ វិរបុត្រ

Related Topics:សហព័ន្ធកីឡាបាល់ទាត់កម្ពុជា