កីឡា

លោក សាន សុក្រិត លើកឡើងពីចំណុចខ្លាំងរបស់ក្នុងស្នងការ និងស្រឡាញ់ក្រុមនេះដដែលពេលប៉ះវិសាខា

បានផុស

៤ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

លោក សាន សុក្រិត សរសើរមិនដាច់ពីមាត់ចំពោះការលេងដ៏ល្អរបស់ក្រុមបាល់ទះស្នងការរាជធានីភ្នំពេញ ពិសេសការប៉ះស្នងការ ន.ប ខេត្តស្វាយរៀង កាលពីម្សិលមិញនេះតែម្ដង ពោលលេងដោយយល់ពីសាច់បាល់ និងដឹងពីដៃគូបានច្បាស់ល្អណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន សុក្រិត

អតីតគ្រូបង្វឹកបាល់ទះជើងចាស់លោក សាន សុក្រិត បានឲ្យដឹងថា ការប្រកួតម្សិលមិញលោកក៏បានទៅទស្សនាផ្ទាល់ផងដែរគឺមើលឃើញថាក្រុមស្នងការរាជធានីភ្នំពេញលេងស្មើដៃគ្នាល្អណាស់ពិសេសភាពវៃឆ្លាតរបស់អ្នកប៉ះសេចែកបាល់បានល្អ។

រូបភាពលើផេកស្នងការរាជធានីភ្នំពេញ

គ្រូបង្វឹកជើងចាស់រូបនេះបន្ថែមទៀតថា ចំណុចល្អផ្សេងទៀតរបស់ស្នងការរាជធានីភ្នំពេញគឺការចាប់សេវាបានល្អទាំងក្រុម និងមួយទៀតនោះគឺការលោតធ្វើរនាំងធំល្អ។ ពោលរនាំងកណ្ដាលរបស់ស្នងការរាជធានីភ្នំពេញគឺឆ្លាតយល់ពីស្ថានភាពគូភាគីលេងនៅក្នុងចំណុចណា ចំណុចខ្លាំង និងចំណុចខ្សោយត្រង់ណា។

រូបភាពលើផេកស្នងការរាជធានីភ្នំពេញ

លោក សាន សុក្រិត បន្តទៀតថា វគ្គពាក់កណ្ដាលផ្ដាច់ព្រ័ត្ររវាងស្នងការរាជធានីភ្នំពេញ និងវិសាខា លោកគិតថា ៥០-៥០% ដូចគ្នា ប៉ុន្តែលោកនៅតែស្រឡាញ់ខាងស្នងការដដែល។ ទាំងពីរក្រុមនេះមានចំណុចខ្លាំង និងចំណុចខ្សោយដូចគ្នា ហេតុដូចនេះអាស្រ័យលើគ្រូរៀងៗខ្លួនមើលឃើញពីចំណុចខ្សោយរបស់ដៃគូ និងរៀបចំយុទ្ធសាស្ត្រតែប៉ុណ្ណោះ។ គ្រូក្រុមណារៀបចំបានល្អជាងក្រុមនោះនឹងឈ្នះការប្រកួតបានឡើងទៅវគ្គផ្ដាច់ព្រ័ត្របន្តទៀត។ ចំពោះសមត្ថភាពកីឡាករគឺមានដូចគ្នា ល្អដូចគ្នា ប៉ុន្តែលោកនៅតែសរសើរភាពរីកចម្រើនសមត្ថភាព និងការយល់ដឹងច្បាស់អំពីការលេងរបស់ដៃគូនៃក្រុមកីឡាករស្នងការរាជធានីភ្នំពេញ។

រូបភាពលើផេកស្នងការរាជធានីភ្នំពេញ

បញ្ជាក់ដែរថា វគ្គ ៨ក្រុមចុងក្រោយពានរង្វាន់សម្ដេច ក្រឡាហោម លើកទី៤ ម្សិលមិញនេះគឺកក្រើតវិស័យបាល់ទះតែម្ដងពិសេសការប៉ះគ្នារវាងក្រុមធំៗដូចជាស្នងការរាជធានីភ្នំពេញ ស្វាយរៀង មហាផ្ទៃ និងវិសាខា នេះតែម្ដង។ ក្រុមស្នងការរាជធានីភ្នំពេញ បានទម្លាក់ម្ចាស់ពានឆ្នាំចាស់ ស្នងការ ន.ប ខេត្តស្វាយរៀង ៣-០ មិនឲ្យតដៃ ស្របពេល វិសាខា ទម្លាក់ក្រុមខ្លាំង ក្រសួងមហាផ្ទៃ ៣-០ ដូចគ្នាបានឡើងទៅវគ្គពាក់កណ្ដាល។ វគ្គពាក់កណ្ដាលផ្ដាច់ព្រ័ត្រស្អែកនេះគឺក្រុមស្នងការរាជធានីភ្នំពេញ ប៉ះ វិសាខា ចំណែក ស្នងការ ន.ប ខេត្តកោះកុង ប៉ះ កងពលធំអន្តរាគមន៍លេខ៣៕