កីឡា

លោក Pep Muñoz ប្រាប់ពីអារម្មណ៍ធ្លាប់តែដឹកនាំ តែពេលនេះមកទស្សនាផ្ទាល់ពិតជារីករាយ

បានផុស

៤ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

លោក Pep Muñoz អតីតគ្រូបង្វឹកព្រះខ័នរាជស្វាយរៀង បានចំណាយពេលមកទស្សនាផ្ទាល់សម្រាប់ការប្រកួតរវាង ភ្នំពេញក្រោន និងព្រះខ័នរាជស្វាយរៀង វេលាម៉ោង ៧ យប់នេះ ជើងទី១ វគ្គ ៨ ក្រុមចុងក្រោយ ពានរង្វាន់ AFC Challenge League រដូវកាល ២០២៥-២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកធ្លាប់តែដឹកនាំក្រុមព្រះខ័នរាជស្វាយរៀង លេងតទល់នឹង ភ្នំពេញក្រោន ក្នុងនាមជាគ្រូបង្វឹក ប៉ុន្តែនៅពេលនេះ លោកមកទស្សនាផ្ទាល់ក្នុងនាមជាអ្នកគាំទ្របាល់ទាត់ម្នាក់ ដូច្នេះពិតជាពិសេសសម្រាប់លោក។

លោក Pep Muñoz បានប្រាប់«កម្ពុជាថ្មី»ថា ៖«ខ្ញុំពិតជារីករាយណាស់ចំពោះកម្រិតសមត្ថភាពរបស់ក្រុមទាំងពីរនៅរដូវកាលនេះ។ ខ្ញុំមកពីប្រទេសឥណ្ឌូណេស៊ីដើម្បីទស្សនាផ្ទាល់ ហើយខ្ញុំជឿជាក់ថា ក្រុមកម្ពុជា និងកីឡាករកម្ពុជាមានកម្រិតប្រហែលគ្នា ឬខ្លាំងជាង»។

ទោះបីជាយ៉ាងណា លោកមិននិយាយអ្វីច្រើនពីការប្រកួត ឬសមត្ថភាពរបស់ក្រុមទាំងពីរឡើយ ពីព្រោះនេះជាការប្រកួតជើងទី១ ហើយក្រុមនីមួយៗអាចមានប្រយុទ្ធសាស្ត្រពេញលេញសម្រាប់ជើងទី២នៅសប្តាហ៍ក្រោយ។

អតីតគ្រូបង្វឹកព្រះខ័នរាជស្វាយរៀង បាននិយាយថា ៖«ការប្រកួតនេះពិតជាសំខាន់ណាស់សម្រាប់ក្រុមទាំងពីរ ប៉ុន្តែយើងត្រូវចាំថា នេះទើបតែជើងទី១ប៉ុណ្ណោះ មិនទាន់សម្រេចយ៉ាងណានោះទេ ចាំជើងទី២នៅសប្តាហ៍ក្រោយ»។

លោក Pep Muñoz បានធ្វើដំណើរពីប្រទេសអេស្ប៉ាញ មកកាន់ប្រទេសឥណ្ឌូណេស៊ី ដើម្បីកិច្ចការផ្ទាល់ខ្លួន នៅក្នុងសប្តាហ័នេះ ហើយបន្ទាប់មកលោកបានធ្វើដំណើរមកកម្ពុជាទស្សនាការប្រកួតរបស់ក្រុមដែលលោកធ្លាប់ដឹកនាំ។ លោកបានដឹកនាំ ក្លិបព្រះខ័នរាជស្វាយរៀង ពីររដូវកាលដោយបានឈ្នះជើងឯកលីគកំពូលកម្ពុជា ២ ឈ្នះជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ១ និងជើងឯករង AFC Challenge League៕

អត្ថបទ៖ វិរបុត្រ