កីឡា

គ្រូប្រដាល់ចាស់-ថ្មី មានក្លឹបកាន់អស់ហើយនៅតែលោក ឡៅ ស៊ីណាត មិនទាន់ចេញបង្កើតនិងគេនៅឡើយទេ

បានផុស

៤ ខែ មុន

នៅ

ថ្ងៃពុធ ១៨ មីនា ២០២៦

ដោយ

គ្រូប្រដាល់ចាស់-ថ្មី ឥលូវនេះកំពុងកាកកប និងបានបើកក្លឹបប្រដាល់ជាហូរហែដើម្បីចូលរួមលើកស្ទួយវិស័យកីឡាមួយនេះផង និងដើម្បីជីវភាពរស់នៅប្រចាំថ្ងៃផង ខណៈអតីតជើងខ្លាំងលោក ឡៅ ស៊ីណាត នៅមិនទាន់ចេញបង្កើតដូចគេនៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡៅ ស៊ីណាត

លោក ឡៅ ស៊ីណាត បានឲ្យដឹងថា ពាក់ព័ន្ធនិងការបើកក្លឹបប្រដាល់នេះលោកក៏មានចិត្តចង់ដូចគ្រូផ្សេងៗ ប៉ុន្តែមិនមានលទ្ធភាព។ ការបើកក្លឹបមួយត្រូវចំណាយច្រើនពិសេសលើការហូបចុករបស់សិស្សជាដើម។ អំឡុងពេលនេះលោកមិនទាន់មានលទ្ធផលនោះឡើយ។

លោក ឡៅ ស៊ីណាត ពេលបង្ហាត់ថ្នាល

អតីតអ្នកប្រដាល់ល្បីឈ្មោះរូបនេះបន្ថែមទៀតថា មួយវិញទៀតលោកក៏មានភារកិច្ចជួយបង្ហាត់ក្មេងៗនៅក្លឹបទ័ពពិសេសឆត្រយោង ៩១១ ផងទើបមិនទាន់គិតរឿងបើកក្លឹបប្រដាល់ផ្ទាល់ខ្លួនដូចគ្រូៗផ្សេងនោះ។ នៅជំហានបន្ទាប់ប្រសិនបើមានលទ្ធភាព ឬឱកាសល្អពេលណានោះលោកក៏ចង់មានក្លឹប និងចង់បណ្ដុះធនធានដោយផ្ទាល់ដៃខ្លួនឯងផងដែរ។

លោក ឡៅ ស៊ីណាត និងប្អូនៗ

បញ្ជាក់ដែរថា បច្ចប្បន្ននេះវិស័យប្រដាល់កំពុងមានការគាំទ្រច្រើន និងសំបូរម្ចាស់ឧបត្ថម្ភទៀតផង។ សន្ទុះនៃការគាំទ្រប្រដាល់នេះមានកាន់តែខ្លាំងក្លឹបបង្កើតថ្មីក៏ចេះតែកើនផងដែរ។ បច្ចុប្បន្នក្លឹបធំៗ និងកំពុងជោគជ័យមានដូចក្លឹបលោក ពេជ្រ សុផាន់ ក្លឹបលោក ធន់ សុភា ក្លឹបលោក សេន ប៊ុនថេន ក្លឹបលោក រិកគី ក្លឹបលោក អេភូថង ក្លឹបលោក ផាត សុដា ក្លឹបលោក បឺត ខាំ ក្លឹបលោក ឈុត សេរី និងបណ្ដាក្លឹបជាច្រើនទៀត។ លោក ឡៅ ស៊ីណាត ជាអតីតអ្នកប្រដាល់ជើងចាស់ល្បីឈ្មោះមួយរូបនៅកម្ពុជា។ លោកជាកីឡាករវាយក្បាច់ និងសំបូរស្នៀតប្រយុទ្ធកាលជំនាន់នៅប្រកួត។ បច្ចុប្បន្នលោកជាគ្រូជំនួយនៅក្លឹបទ័ពពិសេសឆត្រយោង ៩១១ និងជាគ្រូនៅជម្រើសជាតិផងដែរ៕