វឿន វាសនា រកបានពិន្ទុច្រើនជាងគេជាថ្មី ជួយឱ្យ Win Streak ឈ្នះ SkyHawks ក្នុង​លីគ

កីឡាករ វឿន វាសនា របស់ក្រុមបាល់ទះ Win Streak រកបានពិន្ទុច្រើនជាងគេប្រចាំក្រុមជាថ្មី សម្រាប់​ការប្រកួត​ដែល​ក្រុម Win Streak យកឈ្នះលើក្រុម TSG SkyHawks ក្នុងសប្តាហ៍ទី ២៣ នៃលីគបាល់ទះអាជីព តៃវ៉ាន់ (TPVL)។

ការប្រកួតសប្តាហ៍ទី ២៣ នៃលីគបាល់ទះ តៃវ៉ាន់ ដែលបានបញ្ចប់កាលពីថ្ងៃ អាទិត្យ ទី ២៩ ខែ មីនា ឆ្នាំ ២០២៦ ក្រុមបាល់ទះ Win Streak បានយកឈ្នះលើក្រុម TSG SkyHawks ក្នុងលទ្ធផល ៣ សិតទល់នឹង ១។

វឿន វាសនា នៅតែជាស្មាត់ដ៏សំខាន់របស់ក្រុម Win Streak ដោយការប្រកួតនោះ កីឡាកររកបានពិន្ទុច្រើនជាងគេប្រចាំក្រុម រហូតដល់ទៅ ២៦ ពិន្ទុ។ កីឡាករជម្រើសជាតិ កម្ពុជា វ័យ ២៤ ឆ្នាំ រកបាន ២៥ ពិន្ទុពីការវាយផ្តាច់ និង ១ ពិន្ទុទៀតពីការវាយសេវា។

ក្រោយការប្រកួតនេះបញ្ចប់ វាសនា មិនត្រូវបានលីគ TPVL ជ្រើសរើសជាកីឡាករល្អប្រចាំការប្រកួតនោះទេ ដោយតំណែងនេះត្រូវបានប្រគល់ជូនទៅមិត្តរួមក្រុមរបស់គេ កីឡាករ Han Jia ដែលរកបាន ២៣ ពិន្ទុ។ ទោះបីជាយ៉ាងណា វាសនា នៅតែស្ថិតនៅចំណាត់ថ្នាក់ ជាកីឡាករ ដែលឈ្នះពានកីឡាករល្អបំផុតប្រចាំការប្រកួតច្រើនជាងគេនៅរដូវកាលនេះ ពោលគឺចំនួន ១៦ លើក។

គួរបញ្ជាក់ផងដែរ ថា ក្រុមបាល់ទះ Win Streak បានក្លាយជាម្ចាស់ជើងឯកលីគបាល់ទះអាជីព តៃវ៉ាន់ លីគរដូវកាលធម្មតា ឬលីគដំណាក់កាលដំបូង (Regular-Season) ហើយ ទោះការប្រកួតនៅសល់ ៦ ប្រកួតទៀតក៏ដោយ។ ប្រការនេះ គឺ ពួកគេបានកក់កៅអីរួចរាល់ ក្នុងនាមជាក្រុមឈរលេខ ១ ដើម្បីឡើងទៅជុំផ្តាច់ព្រ័ត្រ ដើម្បីប្រកួតជម្រុះ playoff ប្រជែងពានធំរបស់លីគអាជីព តៃវ៉ាន់៕

អត្ថបទ៖ សេម កុសល