អ៊ីតាលី កំពុងស្ថិតក្នុងលក្ខខណ្ឌពិសេសមួយ អាចមានសង្ឃឹមបានលេង World Cup 2026 ឡើងវិញ

ក្រុមជម្រើសជាតិ អ៉ីតាលី អាចមានសង្ឃឹមបានទៅលេងជុំចុងក្រោយនៃព្រឹត្តិការណ៍បាល់ទាត់ជើងឯកពិភពលោក ២០២៦ ឡើងវិញ បន្ទាប់ពីសហព័ន្ធបាល់ទាត់អន្តរជាតិ (FIFA) កំពុងរៀបចំផែនការបម្រុង ក្នុងករណីដែលជម្រើសជាតិ អ៉ីរ៉ង់ ដកខ្លួនចេញពី World Cup 2026 ដោយសារបញ្ហាសង្គ្រាមនៅតំបន់មជ្ឈឹមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចូលរួមរបស់ក្រុមជម្រើសជាតិ អ៉ីរ៉ង់ នៅតែស្ថិតក្នុងស្ថានភាពមិនទាន់ច្បាស់លាស់ ទោះបីជា FIFA បានបញ្ជាក់រួចហើយក៏ដោយ ថា ពួកគេត្រូវបានកំណត់ឱ្យលេងក្នុងពូល G។ ប្រធានសហព័ន្ធបាល់ទាត់ អ៉ីរ៉ង់ ធ្លាប់បានប្រកាស ថា ពួកគេនឹងពហិការទៅចូលរួមការប្រកួត World Cup 2026 ដែល អាមេរិក កាណាដា និងម៉ិកស៉ិក ធ្វើសហម្ចាស់ផ្ទះ ដោយសារតែបញ្ហាសង្គ្រាម ដែលសម្ព័ន្ធមិត្ត អាមេរិក-អ៉ីស្រាអែល វាយប្រហារលើ អ៉ីរ៉ង់។

ប្រសិនបើ អ៉ីរ៉ង់ ពិតជាដកខ្លួនពិតមែន នោះ FIFA នឹងពិចារណាអំពី ការប្រកួតជម្រុះ Playoffs ក្នុងលក្ខខណ្ឌពិសេសមួយភ្លាមៗ ដើម្បីសម្រេចរកមួយក្រុមឡើងមកជំនួសកន្លែងរបស់ពួកគេ។ ការប្រកួតជម្រុះនេះ អាចនឹងត្រូវអនុញ្ញាតឱ្យក្រុមមកពី អឺរ៉ុប ២ ក្រុម និងក្រុមមកពី អាស៊ី ២ ក្រុម ដែលបានធ្លាក់ក្នុងវគ្គជម្រុះតាមទ្វីប ដើម្បីចូលរួមប្រកួត។

សម្រាប់ទ្វីប អឺរ៉ុប គឺ អ៉ីតាលី ត្រូវបានចាត់ទុកថាជាបេក្ខភាពដ៏សក្តិសមបំផុត ដោយសារចំណាត់ថ្នាក់ FIFA របស់ពួកគេខ្ពស់ជាងគេ។ ម្យ៉ាងវិញទៀត ពួកគេប៊ិះនឹងបានឡើងទៅជុំចុងក្រោយទៅហើយ ប៉ុន្តែភ្លាត់ស្នៀតចាញ់ក្រុម បូស្នៀ នៅវគ្គជម្រុះ playoff ចុងក្រោយ។

ដោយឡែកនៅប៉ែកទ្វីប អាស៊ី វិញ គឺជម្រើសជាតិ អារ៉ាប់រួម ត្រូវបានគេមើលឃើញអាចនឹងក្លាយជាបេក្ខភាពសក្តិសមជាងគេ ដោយសារតែពួកគេក៏ប៊ិះនឹងមានឱកាសឡើងផងដែរ ប៉ុន្តែបានចាញ់នៅវគ្គជម្រុះអន្តរទ្វីបក្រោមថ្វីជើងជម្រើសជាតិ អ៉ីរ៉ាក់។

គួរឱ្យដឹង ថា ព្រឹត្តិការណ៍ World Cup 2026 កាន់តែកៀកចូលមកដល់ហើយ ដោយការប្រកួតនឹងចាប់ផ្តើមពីថ្ងៃទី ១១ ខែ មិថុនា ដល់ថ្ងៃទី ២៩ ខែ កក្កដា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ GOAL