កីឡាករ Arsenal ដល់ ១១ នាក់របួស ពេល​លេង​ឱ្យ​ជម្រើសជាតិ ចំពេលក្រុមមមារញឹកប្រជែង​ពាន

កីឡាកររបស់​ក្លិប​ Arsenal ដល់ទៅ ១១ នាក់បានរងរបួស អំឡុងពេលលេងឱ្យជម្រើសជាតិក្នុងថ្ងៃ FIFA’s Day ស្របពេលក្រុមកាំភ្លើងធំកំពុងមមាញឹកខ្លាំង ដើម្បីប្រជែងពានធំ ៣ នៅចុងរដូវកាល ២០២៥-២០២៦។

យោងតាមអ្នកកាសែត អ៉ីតាលី លោក Fabrizio Romano បានឱ្យដឹង ថា មានកីឡាករ ១១ នាក់បានរងរបួស អំឡុងពេលលេងឱ្យជម្រើសជាតិរបស់ពួកគេរៀងៗខ្លួន ហើយកីឡាករទាំងនោះត្រូវបានដកឈ្មោះពីក្រុមភ្លាមៗ។ កីឡាករទាំង ១១ នាក់នោះរួមមាន Bukayo Saka, Declan Rice, Noni Madueke, Eberechi Eze, Jurrien Timber, Martín Zubimendi, Leandro Trossard, William Saliba, Gabriel Magalhães, Piero Hincapié និង Martin Ødegaard។

សមាសភាពកីឡាកររបួសខាងលើ គឺសុទ្ធតែជាកីឡាករសំខាន់ៗក្នុងក្រុមធំរបស់ Arsenal នៅរដូវកាលនេះ។ យ៉ាងណាមិញ បញ្ហារបួសនេះ ក៏បានបង្កជាការព្រួយបារម្ភផងដែរ សម្រាប់ក្រុមកាំភ្លើងធំទាំងមូល ដោយសារពួកគេកំពុងស្ថិតនៅក្នុងបេក្ខភាពប្រជែងពាន ៣ ដូចជា Premier League (កំពុងឈរកំពូលតារាង), Champions League (ឈានចូលវគ្គ ៨ ក្រុម) និងពាន FA Cup (ឈានចូលវគ្គ ៨ ក្រុម)។

ទោះបីជាយ៉ាងណា មិនទាន់មានព័ត៌មានលម្អិតអំពីបញ្ហារបួសរបស់កីឡាករទាំង ១១ នាក់នេះនោះទេ ថា តើពួកគេមានស្ថានភាពរបួសកម្រិតណា និងត្រូវសម្រាកនៅក្រៅទីលានរយៈពេលប៉ុន្មាន៕

ប្រែសម្រួល៖ សេម កុសល
ប្រភព៖ Fabrizio Romano