កីឡា

ក្រុមប្រឹក្សាកីឡាអាស៊ីអាគ្នេយ៍ កំណត់ឱសានវាទ សម្រាប់វៀតណាមធ្វើការសម្រេចចិត្តជាចុងក្រោយ ត្រឹមខែតុលារឿងធ្វើស៊ីហ្គេម

បានផុស

៥ years មុន

នៅ

ថ្ងៃពុធ ២២ កញ្ញា ២០២១

ដោយ

ដោយសារមើលឃើញប្រទេសវៀតណាមហាក់ដូចជាបង្ហាញនូវភាពស្ទាក់ស្ទើរពីការ រៀបចំការប្រកួតកីឡាស៊ីហ្គេមលើកទី៣១ នោះ ក្រុមប្រឹក្សាកីឡាអាស៊ីអាគ្នេយ៍ បានកំណត់ឱសានវាទ សម្រាប់វៀតណាមធ្វើការសម្រេចចិត្តជាចុងក្រោយ ត្រឹមខែតុលាខាងមុខនេះ។

លោក វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំស៊ីហ្គេមលើកទី៣២ និងជាអគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា ការកំណត់ឱសានវាទនេះ បានធ្វើឡើងក្នុងកិច្ច ប្រជុំគណៈអចិន្ត្រៃយ៍របស់ក្រុមប្រឹក្សាកីឡាអាស៊ីអាគ្នេយ៍ កាលពីពេលថ្មីៗកន្លងមកនេះ។ នៅខែតុលាខាងមុខនេះ ក្នុងកិច្ចប្រជុំក្រុម ប្រឹក្សាកីឡាអាស៊ីអាគ្នេយ៍វៀតណាមត្រូវតែធ្វើការសម្រេចចិត្តជាចុងក្រោយថា តើរៀប ចំឬ មិនរៀបចំស៊ីហ្គេមលើកទី៣១ ដែលពន្យារទៅដល់ជិតពាក់កណ្ដាល ឆ្នាំ២០២២នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ាត់ ចំរើន បានបញ្ជាក់ឲ្យដឹងដែរថា ក្នុងករណីគ្មានការសម្រេចចិត្តណាមួយឲ្យច្បាស់លាស់ទេនោះ ព្រឹត្តិការណ៍ស៊ីហ្គេមលើកទី៣១ នឹងត្រូវលុបចោលជាប្រវត្តិសាស្ត្រតែម្ដង។ ជាមួយគ្នានេះ ប្រទេសដែលត្រូវធ្វើជាម្ចាស់ផ្ទះបន្តពីវៀតណាម នឹងបានទទួលសិទ្ធិជាប្រធានស៊ីហ្គេម ដើម្បីបញ្ចៀសនូវការរាំងស្ទះដល់ដំណើរការរៀបចំស៊ីហ្គេម ។

ទោះជាយ៉ាងណា ក្នុងនាមជាសមាជិកអាស៊ាននឹងព្យាយាមសម្របសម្រួលគ្នា ដោយសន្តិវិធី ព្រោះអាស៊ានមានសាមគ្គីភាព និងឯកភាពផ្ទៃក្នុងល្អណាស់។ ហេតុនេះប្រទេសជាសមាជិក នឹងនិយាយគ្នាដោយសម្រួលព្រមទាំងប្រឹក្សាគ្នា រកដំណោះស្រាយល្អមួយ ដោយគោរពទៅតាមធម្មនុញ្ញរបស់ស៊ីហ្គេម៕

អត្ថបទ៖ វិសិទ្ធ

Related Topics:កីឡា