កីឡា

ប្រទេសដែលនាំមុខក្នុងការទិញសំបុត្រ FIFA World Cup 2022 នៅប្រទេសកាតា

បានផុស

៤ years មុន

នៅ

ថ្ងៃចន្ទ ១១ កក្កដា ២០២២

ដោយ

ការប្រកួតបាល់ទាត់ពិភពលោក FIFA World Cup 2022 កាន់តែខិតជិតមកដល់ ខណៈសំបុត្រក៏បានដាក់លក់រួចមកហើយផងដែរ ខណៈគេបានមើលឃើញប្រទេសជាច្រើនបានកក់សំបុត្រទស្សនាក្រោយបានលើកភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាប័នគ្រប់គ្រងបាល់ទាត់ពិភពលោក FIFA បាននិយាយកាលពីពេលថ្មីៗថា អ្នករៀបចំការប្រកួតបានលក់ដាច់សំបុត្រអស់ចំនួន ១.៨ លានសន្លឹក សម្រាប់ការប្រកួតបាល់ទាត់ពិភពលោក (FIFA World Cup 2022) នៅប្រទេសកាតា។ FIFA បាននិយាយថា មានប្រភេទសំបុត្រពិសេសដែលមានសម្រាប់តែអ្នករស់នៅក្នុងប្រទេសម្ចាស់ផ្ទះ ហើយអ្នកគាំទ្រនៅក្នុងឈូងសមុទ្រអារ៉ាប់ បានទិញសំបុត្រច្រើនជាងគេ។

FIFA បាននិយាយនៅក្នុងសេចក្តីប្រកាសព័ត៌មានមួយថា ក្រៅពីម្ចាស់ផ្ទះកាតា ប្រទេសឈរលើគេដែលអ្នកគាំទ្រទិញសំបុត្រមានដូចជា កាណាដា, អង់គ្លេស, បារាំង, អាឡឺម៉ង់, ឥណ្ឌា, អារ៉ាប៊ីសាអូឌីត, អេស្ប៉ាញ, អារ៉ាប់រួម និងសហរដ្ឋអាមេរិក។ អ្នកនាំពាក្យ បាននិយាយថា FIFA រំពឹងថានឹងផ្តល់សំបុត្រប្រកួតសរុបចំនួន ៣ លានសន្លឹកក្នុងអំឡុងពេលការប្រកួតរយៈពេល ២៨ ថ្ងៃដែលនឹងចាប់ផ្តើមនៅថ្ងៃទី ២១ ខែវិច្ឆិកា។

គួរដឹងដែរថា អ្នកគាំទ្របាល់ទាត់អាចទិញសំបុត្ររហូតដល់ ៦ សន្លឹកក្នុងមួយប្រកួត និងអតិបរមា ៦០ សន្លឹកសម្រាប់ការប្រកួតពេញមួយព្រឹត្តិការណ៍ទាំងមូល។

តម្លៃសំបុត្រមានបែងចែកចេញជា ៧ វគ្គផ្សេងគ្នា រួមមានថ្ងៃប្រកួតបើកឆាកថ្លៃបំផុត ៦១៧ ដុល្លារថោកបំផុត ៥៤ ដុល្លារ។ វគ្គជម្រុះក្នុងពូល ថ្លៃបំផុត ២១៩ ដុល្លារ ថោកបំផុត ១០ ដុល្លារ។ វគ្គ ១៦ ក្រុមចុងក្រោយ ថ្លៃបំផុត ២៧៤ដុល្លារ ថោកបំផុត ១៩ ដុល្លារ។ វគ្គ ៨ ក្រុមចុងក្រោយ ថ្លៃបំផុត ៤២៥ ដុល្លារ ថោកបំផុត ៨២ ដុល្លារ។ វគ្កពាក់កណ្ដាលផ្ដាច់ព្រ័ត្រ ថ្លៃបំផុត ៩៥៥ ដុល្លារ ថោកបំផុត ១៣៧ ដុល្លារ។ ប្រកួតដណ្ដើមយកលេខ ៣ ថ្លៃបំផុត ៤២៥ ដុល្លារ ថោកបំផុត ៨២ ដុល្លារ និងវគ្គផ្ដាច់ព្រ័ត្រ ថ្លៃបំផុត ១៦០០ ដុល្លារ ថោកបំផុត ២០០ ដុល្លារ។ បញ្ជាក់ថា នេះជាតម្លៃប្រហាក់ប្រហែល។

អ្នកគាំទ្រឆ្នាំនេះពិសេស ដោយនឹងត្រូវដាក់ពាក្យសុំ Hayya Card ដែលជាអត្តសញ្ញាណប័ណ្ណអ្នកគាំទ្រពិសេស ត្រូវការសម្រាប់បុគ្គលណាម្នាក់ដែលមានគម្រោងធ្វើដំណើរទៅប្រទេសកាតា ដើម្បីចូលរួមការប្រកួតបាល់ទាត់ពិភពលោក។ វាក៏ផ្តល់ការដឹកជញ្ជូនសាធារណៈដោយឥតគិតថ្លៃនៅថ្ងៃប្រកួតផងដែរ។ ហើយដើម្បីទទួលបានកាត Hayya អ្នកគាំទ្របាល់ទាត់ត្រូវបានតម្រូវឱ្យកក់សំបុត្រការប្រកួត និងការស្នាក់នៅរបស់ពួកគេ មុនពេលចុះដល់ប្រទេសកាតា។

FIFA World Cup 2022 នឹងចាប់ផ្ដើមពីថ្ងៃទី ២១ ខែវិច្ឆិកា ហើយនឹងបញ្ចប់នៅថ្ងៃទី ១៨ ខែធ្នូ ឆ្នាំ ២០២២ នៅប្រទេសកាតា៕

អត្ថបទ៖ មន្នីរ័ត្ន