កីឡា

ម្ចាស់មេដាយមាស២គ្រឿង ប្រាក់១គ្រឿង វុិត ចន្ថា «កត្តាសំខាន់ឲ្យជោគជ័យគឺឆន្ទៈ»

បានផុស

២ years មុន

នៅ

ថ្ងៃព្រហស្បតិ៍ ១១ សីហា ២០២២

ដោយ

កីឡាការិនីអត្តពលកម្មជនមានពិការភាពកម្ពុជា វ៉ិត ចន្ថា បានឈ្នះមេដាយ៣គ្រឿងគឺមាស២ និងប្រាក់១ពីព្រឹត្តិការណ៍អាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូនេស៊ី ដែលទើបតែបញ្ចប់កាលពីថ្ងៃទី៦ ខែសីហា កន្លងទៅនេះ។

វ៉ិត ចន្ថា ជាម្ចាស់មេដាយមាស២គ្រឿងក្នុងចំណោមមាស៧គ្រឿងដែលអត្តពលិកជនមានពិការភាពកម្ពុជាទទួលបានពីអាស៊ានប៉ារ៉ាហ្គេម លើកទី១១នេះ និងបានក្លាយជាកីឡាការិនីកម្ពុជាដំបូងគេបង្អស់របស់ព្រះរាជាណាចក្រកម្ពុជាដែលឈ្នះមេដាយមាសដល់ទៅ២គ្រឿងក្នុងព្រឹត្តិការណ៍អន្តរជាតិតែមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនពេលទទួលបានលទ្ធផលគួរជាទីមោទនៈ និងមហាកិត្តិយសក្នុងការនាំទង់ជាតិកម្ពុជាបង្ហូតលើឆាកអន្តរជាតិនេះ វ៉ិត ចន្ថា បានប្រឹងប្រែង លះបង់ និងតស៊ូជម្នះក្តីលំបាកគ្រប់បែបយ៉ាងជាច្រើនឆ្នាំមុនហើយ។ វ៉ិច ចន្ថា បានប្រាប់ថា ៖«ខ្ញុំប្រឹងប្រែងហ្វឹកហាត់អស់រយៈពេលជាយូរមកហើយ។ ថ្ងៃដែលទន្ទឹងរង់ចាំគឺបានមកដល់ ហើយទទួលបានជោគជ័យ។ ឈ្នះមេដាយមាស២គ្រឿង និងប្រាក់១គ្រឿង»។

កីឡាការិនីរូបនេះបន្តថា ៖«ខ្ញុំរំភើបណាស់ដែលបាននាំយកទង់ជាតិកម្ពុជាបង្ហូតលើឆាកអន្តរជាតិឲ្យប្រទេសដទៃបានឃើញ និងបញ្ជាក់ថា ខ្មែរក៏មានសមត្ថភាព។ ខ្មែរក៏អាចធ្វើបាន។ ការហ្វឹកហាត់របស់ខ្ញុំមិនថា ពេលព្រឹក ថ្ងៃត្រង់ ថ្ងៃរសៀល ថ្ងៃក្តៅយ៉ាងណាទេ គឺខ្ញុំហ្វឹកហាត់ជានិច្ច។ ខ្ញុំចងចាំពាក្យមួយឃ្លារបស់សម្តេចតេជោថា ខ្មែរធ្វើបាន»។

ម្ចាស់មេដាយ៣គ្រឿងលើកឡើងថា ក្នុងនាមជាកីឡាករ កីឡាការិនីត្រូវមានឆន្ទៈខ្ពស់ក្នុងការហ្វឹកហាត់ និងប្រកួតប្រជែង ហើយមិនត្រូវខ្លាចពាក្យថា លំបាក។ «ខ្ញុំចង់ប្រាប់ដល់បងប្អូន មិនថា ជនពិការ ឬមិនពិការទេ សំខាន់គឺឆន្ទៈរបស់យើង។ បើចិត្តយើងប្តេជ្ញាថា យើងធ្វើបាន យើងនឹងខំប្រឹងប្រែង តស៊ូ លះបង់ ក្នុងការហ្វឹកហាត់។ មិនចាំបាច់តែម៉ោងពេលលោកគ្រូដាក់ឲ្យហាត់ទេគឺយើងហាត់ឲ្យបានច្រើនជាងគ្រូ។ បើគ្រូដាក់កម្រិតឲ្យហាត់ត្រឹម១០ យើងត្រូវហាត់ឲ្យដល់២០។ គ្រូឈប់បង្ហាត់ យើងត្រូវតែបន្តហាត់»។

សូមបញ្ជាក់ថា កីឡាការិនី វ៉ិត ចន្ថា បានឈ្នះមេដាយមាស២គ្រឿងគឺលើវិញ្ញាសាលោតចម្ងាយ និងវិញ្ញាសារត់ចម្ងាយ ៤០០ម៉ែត្រ ព្រមទាំងមេដាយប្រាក់រត់ចម្ងាយ២០០ម៉ែត្រ៕

អត្ថបទ៖ វីរបុត្រ

Related Topics:កីឡាអត្តពលកម្ម