មិនសរសើរមិនបាន! អ្នកគាំទ្រជប៉ុន នៅតែធ្វើឲ្យពិភពលោក កោតស្ញប់ស្ញែង 

ជាថ្មីម្តងទៀត អ្នកគាំទ្ររបស់ជប៉ុន នៅតែបន្តយកឈ្នះលើក្រុមអ្នកគាំទ្រតាមប្រព័ន្ធអ៊ីនធើណិត ដោយសារពួកគេនាំគ្នាសម្អាតកីឡដ្ឋាន បើទោះបីជាក្រុមរបស់ពួកគេចាញ់កូស្តារីកាក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពេលជប៉ុនទទួលបានជ័យជម្នះដ៏គួរឲ្យភ្ញាក់ផ្អើលលើអាល្លឺម៉ង់ក្នុងការប្រកួតដំបូង ប៉ុន្តែអ្នកគាំទ្រជប៉ុនហាក់ខូចចិត្តបន្ទាប់ពីកីឡាករ Keysher Fuller របស់កូស្តារី រកបានមួយគ្រាប់ យកឈ្នះក្រុមរបស់ពួកគេកាលពីថ្ងៃអាទិត្យទី២៧ខែវិច្ឆិកា។

ទោះបីជាយ៉ាងណាក៏ដោយ ខណៈអ្នកគាំទ្របាល់ទាត់ជាច្រើនមានការអាក់អន់ចិត្តក៏ដោយ ប៉ុន្តែហ្វេនរបស់ជប៉ុន បានធ្វើឲ្យពិភពលោកស្ញប់ស្ញែងជាថ្មីម្តងទៀត ដោយពួកគេបានសម្អាតកីឡដ្ឋាន Ahmad Bin Ali ក្នុងប្រទេសកាតា។

អ្នកគាំទ្រជប៉ុន បានបង្កការកោតសរសើរ បន្ទាប់ពីពួកគេត្រូវបានគេមើលឃើញសម្អាត មិនត្រឹមតែសម្រាប់ការប្រកួតផ្ទាល់របស់ក្រុមពួកគេជាមួយអាល្លឺម៉ង់ប៉ុណ្ណោះទេ ប៉ុន្តែថែមទាំងក្នុងអំឡុងពេលបើកការប្រកួត World Cup រវាងកាតា និងអេក្វាឌ័រផងដែរ។

អ្នកលេងអ៊ីនធើណិត​ម្នាក់​​និយាយ​ថា “អ្នក​ទាំង​នេះ​គឺ​ជា​អ្នក​ឈ្នះ​ World Cup ពិត​ប្រាកដ!”។ ម្នាក់​ទៀតនិយាយ​ថា​ “​ទោះ​ចាញ់​ក្ដី ក៏​អ្នក​គាំទ្រ​ជប៉ុន​នៅ​តែ​សម្អាត​កីឡដ្ឋាន​ដែរ”។

ជាមួយគ្នានោះ គណនីផ្លូវការរបស់ FIFA និយាយថា “ទោះឈ្នះ ឬចាញ់ តែងតែមានការគោរពជានិច្ច។ អរគុណសម្រាប់ការជួយសង្គ្រោះភពផែនដី អ្នកគាំទ្រជប៉ុន!”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ បរាជ័យរបស់ បែលហ្ស៊ិក យប់មិញ ប្រែក្លាយទៅជាកុបកម្ម ពាសពេញទីក្រុង